Campaign on Medicinal Plants hawng

State Medicinal Plants Board (SMPB) bultuma ‘365 Days Campaign on Medicinal Plants’ neih tur chu, nimin khan Central YMA Hall-ah Health minister Lal Thanzara'n a hawng.

Health Minister chuan, ramhmul damdawi (medicinal plant)-te khawvelah a ṭhan chak thu sawiin, "Ram changkang zawkte'n an chhawr ṭangkai a, sum vaivir pawh a tam. Mizoramah pawh ramthing hnah kung damdawi hmang
ṭangkaia sum chang theia siama hmalak sorkarin a tum a ni," a ti.

AYUSH hmalaknain Mizoram district hrang hranga khaw thlan bikah medicinal plant-te chìntir an ni tih sawiin Lal Thanzara chuan, "Heng hi state páwnah thawn chhuak a, eizawnna tlaka siam leh Mizoramah ngei ramthing hnah kung damdawi hlutzia inzirtir zel tum a ni," a ti a; Mizorama thlai hnahte chu ram dang aiin an ṭha zawk niin a sawi.

Health Minister chuan, ramhmul damdawi chi hrang hrang Mizorama awmte humhalh leh venhim chu mipuite mawhphurhna a nih thu a sawi a, "Mizoram aṭanga thar chhuah medicinal plant-te hi neitu nihna (patent) neih ngei tum a ni," a ti.

Central YMA president Lalbiak-zuala chuan, ramhmul damdawi humhalh kawngah tun hma aṭangin CYMA-in hma a lak ṭhin thu sawiin, "Khaw hrang hranga YMA-in ram a neihte pawh humhalhin, ramhmul damdawi chìnna bik ‘plantation’ atan hman a ni," a ti a; ramhmul damdawi tihlâr leh Mizote'n an chhawr theih nan CYMA-in nasa taka hmalak zel an tum thu a sawi.

Prime Minister-in ram chhunga ramhmul damdawi humhalh leh chawi lâr a ngaih pawimawh avangin Ministry of AYUSH chuan August 20-21, 2016 khan ram puma kalpui tur ‘365 Days Campaign on Medicinal Plants’ hi Jaipur, Rajasthan-ah an hawng a ni.