MṬKP-in rilru hrisel inzirtir an rel

Mizoram Ṭhalai Kristian Pawl (MṬKP) inkhawmpui neih mekah nimin khan BCM Biak-In, Lunglawn, Lungleiah rorel inkhawm neih a ni a, rilru hrisel inzirtir an rel. Kum 2025 - 2028 chhunga MṬKP hruaitu tur an thlang nghal.

MṬKP rorel inkhawm hi president Upa R Lalrochama'n kaihruaiin, kum kal tàa ṬKP member ropuina rama kalte sûnna hun ngawi rengin minute khat dingin hman a ni a, sr. adviser Upa Dr Lalchhanhima Fanchun-in an kalsan chhûngkua leh rawngbâwlpuite tâna ṭawngṭàisakna hun a hmang.

Rorèl inkhawmah hian rorêl palâi mi 588 kalin, unit aiawhin mi 367, bial aiawhin mi 163 leh MṬKP executive 31 te rorelnaah hian an tel a, BCM General Secretary, FD Director, Fellowship department, bialtu pastor leh co-opted 3 bakah palâi sàwmte aṭangin MBMP, SSBATKP, TBYF, ECMKTP, JSTKP, APBF, IKKCTP, CKJD leh CKBD te’n rorel hi an telpui.

MṬKP secretary Rev. F Zorinkhuma tarlan danin, kum 2024 rorèl leh 2025 rorèl inkârah ṬKP member ropuina rama kal mi 158 (mipa 139 leh hmeichhia 19) an awm a, innei tuak 618 awmin, kohhran dân puitlinga innei tuak 401 leh dân tea innei tuak 235 an ni.

Finance secretary Rbt. H Lalruatkima leh treasurer J Lalrintluangite chuan kum 2024 - 2025 chhûngin Rs. 61,21,067 hmuh a nih thu te, heta ṭang hian Rs. 54,27,042 hman a nih thute, kuta awm hi Rs. 6,94,025 a nih thute an tarlang.

MṬKP rorel inkhawma an thu pawm zingah 'Ram tana chawnghei ṭawngṭai neih ni se' tih te, 'ṬKP ten thlarau bo man beihpui thlak ni se' tihte leh 'Rilru hrisel chungchang zirtirna neih ni se' tihte a tel.

MṬKP hnuaiah hian bial ṬKP 92 leh unit ṬKP 447 awmin, tun dinhmunah member 50,364 (mipa 30,562 leh hmeichhia 19,802) an awm mek a, kum 2024 aṭanga member punna hi 1571 a ni.