CADC VC inthlan March 12-ah

State election commissioner (SEC) Dr H Lalthlangliana chuan nimin khan a pisaah Chakma Autonomous District Council (CADC) huam chhunga village council (VC) inthlanpui neih tur chungchang thuthar thehdarhtute a hrilhfiah a; CADC hnuaia VC 88-ah March 12, 2025 khian inthlan neih a nih dawn thu a puang.

SEC-in CADC-a VC inthlan hun tur a puan aṭang hian CADC huam chhungah model code of conduct (MCC) hman nghal a ni a, VC inthlanpui kaihhnawih thil zawng zawng zawhfel hun tura ruat March 18, 2025 thleng hman a ni dawn. MCC hian political party, VC candidate, minister, parliamentary secretaries, MP, MLA, CEM, EM, MDC leh VC inthlanin a kaihhnawih sorkar hnathawkte a huam a ni.

CADC-ah hian VC 88-ah general seat 426 leh reserved seat 88 a awm thu sawiin SEC chuan, "Autonomous District Council-te hian reserved-ah a hranin dan an nei a, ADC pawna VC seat tam dan a zira reserved seat awm ang kha ni loin, CADC-ah chuan VC seat 3-7 pawh ni se reserved seat hi VC tinah pakhat ṭheuh a awm a ni," a ti a, tluang taka inthlan neih a nih theih nan political party, inthlan buaipuitu te, candidate-te leh mipui ṭawiawmna a ngen nghal a ni.

CADC hnuaia VC 88-ah hian chenna in 16,991 awmin, voter 37,883 (mipa 19,162 leh hmeichhia 18,721) an awm. Chenna in 50 chin hnuailamah VC seat pathum, in 51-100 inkarah seat panga, in 101-150 inkarah seat paruk leh in 151 chunglamah seat pasarih a awm a ni. VC 88-ah hian belhkhawmin VC seat 516 a awm a, hengte hi mipa leh hmeichhiain thliar bik awm loa an chuh theih general seat 428 leh hmeichhe tan bik chauha hauh reserved seat 88 a ni.