KHAWTHLIR

ZPM chak

Candidate pakhat a thih avanga February 12-a inthlan ve theih lohna Lalnutui, Lunglei district-ah chuan February 13, Ningani khan village council inthlan buatsaih a ni a, seat thum awmah ZPM-in seat hnih laiin hnehna an chang. INC-in seat pakhat an la. Candidate thih avanga inthlan hun sawnna tho Aizawl Municipal Corporation (AMC) chhunga Lawipu LC inthlan chu nimin neih a ni a, zing dar 7 aṭanga tlai dar 4 thleng vote thlak niin, Lawipuah hian voter 1,149 (mipa 527 leh hmeichhia 622) an awm a ni.

Kawng zawh

Mamit HSS NSS leh Nation TB Elimination Programme (NTEP) ṭangkawp chuan nimin khan 100 days TB Campaign pualin kawng zawh (rally) an huaihawt a, TB umbo tura intiamna neih nghal a ni.

Meth an man

Excise and Narcotics department chuan February 13, Ningani zan dar 8:40 khan Aizawl Tennis Court bulah methamphetamine kg. 9.584 leh a neitua puh Jacob Thanga (34) s/o Lalnunmawia, Bualte, Rihkhawdar bul, Myanmar-a khawsa nia inchhal an man. Methamphetamine phurhna atana hman NEXA Ignis car MZ/04 B- 0191 chu hrensak nghal a ni. Methamphetamine hi Myanmar aṭanga lak niin hmun danga hralh tura tih mek lai a ni.

Kawng siam sawiho

Khawzawl district bawrhsap K Vanlalṭhiana hoin DC meeting hall-ah sorkar hotute leh NHIDCL hotuten Khawzawl district-a kawng chhe zual leh a siamṭhat dan tur an sawiho. DC chuan Khawzawl district-a kawng chhia vangin kut hnathawktuten harsatna an tawk fo ṭhin tih a sawi a, "Hemi kawngah hian a mawhphurtute'n hma an lak a ṭul hle," a ti.

Inthlan thlirlet

Serchhip district election officer Paul L Khuma, bawrhsap kaihhruaiin nimin khan sorkar hotute leh inthlan buapuituten village council inthlanpui 2025 thlirletna an nei a; Paul L Khuma chuan harsatna leh buaina lian tham awm loa inthlan neih a ni chu lawmawm a tih thu a sawi.