Kolasibah Road Safety Month hawng

Kolasib SP David H Lalthangliana chuan nimin khan Kolasib Diakkawn Traffic Point-ah Road Safety Month a hawng a; kum 2023 chhung khan Kolasib district-ah lirthei chesual vangin mi 15 an thih thu leh kum 2024-ah mi pariat leh kuminah mi pakhat an thih tawh thu tarlan a ni.

David H Lalthangliana chuan, Road Safety Month pual hian tun thla tir aṭang khan Kolasib Traffic Police leh MVI-te'n lirthei endik hna an kalpui tawh thu a sawi a, "Kan him tlan zawk nana inzirtirna leh fimkhurna kawnga hmalakna uar zawka a kal theih nan Road Safety Month hi a thla bila siam a ni. Dan hrang hrangte chu kan him tlan zawkna atana siam niin, keimahni tan a ni," a ti a, fimkhur tura uar leh zuala inhrilhhriat nan he thla hi hman ṭangkai a pawimawh thu a sawi.

Traffic dan bawhchhiate hremna pawh a sàn tawh thu sawiin Kolasib SP chuan, "Mi tinten mahni zawn ṭheuhah sorkarin kan him zawk nana dan a siamte kan zawm a pawimawh takzet a ni," a ti.

He hunah hian sorkar hotute, Kolasiba lirthei khalhtute leh lirthei neitu aiawhte leh khawtlang hruaitute an tel a; Road Safety Month pual thutiam an sawirual nghal a ni.