Kangmei Ven Hapta hawn a ni

Siaha leh Kolasib district-ah nimin khan district bawrhsapten Kangmei Ven Hapta (Fire Prevention Week) 2025 an hawng a; kalkhawmten hapta thutiam an sawirual.

Siahaah chuan District Level Fire Prevention Committee buatsaihin MADC Forest conference hall-ah hman a ni a; bawrhsap VL Hruaizela Khiangte-in hawngin, "Ram kângin mihring leh nungchate a nghawng nasatzia leh boruak a tihchhiat zia hretu kan ni a, ram kâng tur ven chu mi tin mawhphurhna a ni," a ti a, mahni mawhphurhna hlentu ni ṭheuh turin kalkhawmte a sawm.

MADC DCF Jimmy N Ramdina tarlan danin, kum 2024 khan Siaha district-ah ram hectare 222.65 a kang. MTP assistant secretary Solomon N Beihlotha pawhin thu a sawi.

Kolasib Parish Hall-ah Fire Prevention Week chu bawrhsap Robert C Lalhmangaiha'n a hawng a; thu sawiin, "Zoram lo chu ram dang kan nei lo a, he ram hi kan hmangaihin kan enkawla, kan venghim a ṭul. Pathianin leilung venhim hi kan mawhphurhna atana a nghah a ni tih theihnghilh lo ang u," a ti.

He hunah hian DFO Jenny Sailo leh ACF Thanliana Hauhnar ten thu an sawi a, kangmei ven chhungchanga article inziahsiak lawmman an sem nghal.