KHAWTHLIR

KṬP-in thisen pe

February 15, Inrinni khan KṬP, Dawrpui Vengthar Branch chuan an kohhran hall-ah Synod Hospital tan thisen unit 44 an pe a, petute mipa 42 leh hmeichhia pahnih an ni a; KṬP, Bawngkawn Bethel Bial pawhin Bawngkawn Bethel Kohhran Hall-ah Aizawl Civil Hospital tan unit 24 an pe a, petute mipa 20 leh hmeichhia pali an ni.

KṬP Day

Nimin February 16, Pathianni khan KṬP din champha a ni a, KṬP Day pual hian KṬP branch hrang hrangte'n biak-in tualah KṬP flag an zar. KṬP hi kum 1954-ah din a ni a, kum 2024 dinhmun angin, KṬP branch 904-ah member 1,71,404 an awm mek a, mipa 1,04,736 leh hmeichhia 66,668 an ni.

MCC hlih a ni

February 12, 2025-a village council leh local council inthlan avanga Election Model Code of Conduct puan chu February 15, Inrinni tlai dar 2 aṭang khan State Election Commission-in hlip. Model Code of Conduct hi January 16, 2025 tlai dar 2 khan puan a ni.

Lawipu-ah sorkar siam thei awm lo

Candidate a thih avanga hmun dang ruala local council inthlan buatsaih theih lohna Lawipu, Aizawlah chuan February 14, Zirtawpni khan inthlan buatsaih a ni a, party mala sorkarna siam thei an awm lo. Lawipu LC thlanah hian mipa 364 leh hmeichhia 430, an vaiin mi 794 (69.10%)-in vote an thlak a, seat panga awmah ZPM leh MNF-te'n seat pahnih ve ve leh INC-in seat pakhat an la a ni.

A thlawna inentirna

Social Welfare & Tribal Affairs, Department of Ayush leh Mizoram Psychological Association chuan February 14, 2025 khan ruihhlo ngai enkawlna hmun pathum - Synod Hospital K-Ward, Synod Rescue Home leh Durtlanga Agape Home-ahte a thlàwna in entirna an buatsaih a, ei leh in tur eng emaw zat an pe bawk. A thlawna inentirna hun hi SWTA director Dr Lalhriatzuali Ralte-in a hmanpui a; inentirte hnenah an mamawh ang damdawi a thlâwnin an pe nghal a ni.

Dy. Speaker-in hmanpui

Assembly deputy speaker Lalfamkima chuan February 14, 2025 zan khan Mizo Zaimi Inzawmkhawm, Kolasib-in an pawl din champha TNT, Kolasib-a an hman a hmanpui. Lalfamkima chuan, MZI-in TNT, Kolasib-ah hun hlimawm an buatsaih paha ṭanpuina an pe chu fakawm a tih thu a sawi.

Kuhva phurh khap

Hnahthial district magistrate Rita Lalnunmawii chuan Bhartiya Nagarik Suraksha Sanhita, 2023 Section 163 tlawhchhanin thupek a chhuah a; Hnahthial district chhungah dan loa kuhva ro lak luh leh phurh phal a nih loh thu a tarlang. Magistrate chuan, thupek zawm lote chu dan hmanga hrem theih an nih thu a tarlang a, "Thupek hian ṭul bik thila tihdanglam a nih loh chuan tihchhuah a nih aṭanga thla 2 chhung a huam ang," a ti.