Sorkar hnathawkah inthlahdah bik an awm a rem lo - CM Lalduhoma

Chief minister Lalduhoma chuan, sorkar tharah chuan sorkar hnathawk zingah inthlahdah bik an awm a rem loh thu a sawi.

CM Lalduhoma hian February 15, Inrinni zing khan Zemabawk North-a Sericulture Complex a tlawh a, thu sawiin, "Sorkar tharah chuan sorkar hnathawk inthlahdah bik an awm a rem lo. Kan ramin hma a sawn zel theihna atana sorkar kut leh ke ber chu sorkar hnathawkte an nih avangin sorkar chuan a hnathawkte chungah pawh a thîkthu a tichhe hma bik a ni," a ti.

Sericulture department chu an pawimawh tih sawiin Lalduhoma chuan, "Mizoram ei leh bar chawikan nana hmanraw ṭangkai ber an ni thei. Central sorkar pawhin sericulture hi a ngai pawimawh a, project eng emaw zat bawhzui tura ruahmanna siam mek a ni," a ti a; mipuite'n sericulture hmanga eizawn an uar theih nan tuna aia nasa lehzuala inzirtirna neih a ṭul thu a sawi.

Chief Minister ṭawiawmtu Sericulture minister Lalthansanga chuan, Sericulture department enkawl tura tih a nih avangin a lawm thu a sawi a, "Department hmalakna leh hmachhawpte thawktute nen uluk takin kan enho ṭhin a, tunah pawh hian hmachhawp lian tak tak kan nei mek. Sericulture hi eizawnna tlak a ni a, pangang chaw ṭha ber berte hi Mizoramah hian a ṭha duh em em vek a ni," a ti.

ZPM auhla ber - eizawnna ngêlnghet zawk neih theihna tura an hmachhawp zingah sericulture a tel tih sawiin Lalthansanga chuan, "Ramngaw ṭhiat zawng ni lo, ramngaw siam belhna a nih avangin a hlâwkna hi kawng hnihin kan ram hian a tél thei a ni," a ti a, department-a thawktute chu ṭhahnemngai taka thawk zel turin a chah.

Chief Minister leh Sericulture Minister hian Sericulture Complex chhunga department hmalakna hmun hrang hrang - reeling machine, twisting machine, cocoon drier-te leh dying machine-te an en a ni.