Chapchar Kût lawmna atan SBI-in CM hnenah Rs 5,00,000 an hlan

Chief minister Lalduhoma leh Mumbai-a State Bank of India managing director Vinay M Tonse te chu February 15, Inrinni khan Chief Minister's Office-ah an inkâwm. SBI hotu hian kumina Chapchar Kût lawmnaa a ṭula hman atan CM hnenah Rs 5,00,000 a hlan.

CM Lalduhoma chuan, Mizoramah SBI-in hna ṭha taka an thawh ṭhin thu sawiin, lawmawm a tih thu a sawi a; SBI deputy general manager ni lai LP Lalchangkima, Mizoram sorkarin a mamawh avanga deputation-a Mizoram sorkar hnuaia awm tura an dilna SBI hotute'n an tihhlawhtlinsak avangin a lawm thu a sawi bawk.

Inkawmnaah hian SBI clerical-ah Mizo ṭhalai tam zawk an luh theih nan special recruitment neih theih dan tur te, Mizoram sorkarin infiammite tana Empowering Mizoram Sports a kalpui meka SBI Foundation nena thawhho dan tur te, bank-te'n income tax return certificate an phût ṭhin vanga income tax pe ve lo Mizo mipuite'n harsatna an tawh ṭhin chinfel dan tur te, SBI leh bank ṭhenkhatin CD ratio ṭha tak an neih laia bank ṭhenkhatin an tih ṭhat tawk loh dante sawi a ni.

Vinay M Tonse chuan, Chief Minister-in a ngaimawh zawng a sawite chu theihtawp chhuaha a bawhzui tur thu a sawi.