Supply order-a tarlan aia tlâwm RD dept.-in supply an phalsak
Comptroller and Auditor General (CAG) of India report-a a lan danin, Rural Development (RD) department chuan supplier-in a ngen avangin rangva bundle 12,546 chu State Purchase Advisory Board (SPAB)-in a pawmpui aia chhe zawk an supply tír.
CAG tarlan danin, kum 2012-13 khan Mizoram sorkar chuan a mamawhte hnena rangva pek a nih theih nan cheng nuai 400 an ruahman a; nuai 400 aṭang hian nuai 380 chu rangva leina atana tih a ni a, nuai 20 chu Aizawl aṭanga block headquarters-a rangva phurhna atana tih a ni.
RD department chuan rangva supply tur zawnna atan October 2012-ah tender an chhuah a, a chhang hniam ber M/s LRS Enterprise an thlang a, LRS Enterprise chuan bundle khat Rs. 3,029-a supply turin an chhang.
December 3, 2012-a SPAB ṭhukhawm chuan M/s LRS Enterprise chu rangva bundle khat Rs. 3,029 supply turin an rawt a; rangva supply tur chu Rhino brand, bundle khat kg. 53.60-a rit, milimetre 0.35-a chhah, ft. khat ni tura a tih a ni. SPAB rawtna hi January 15, 2013-ah Mizoram sorkar chuan a pawm.
Supplier LRS Enterprise chuan March 12, 2013-ah rangva an supply ṭan a, mahse, a rih zawng tura bituk aia a zân avangin hnâwl a ni.
Supplier chuan March 20, 2013-ah rangva bundle khat kg. 53.60-a rit chu Rs. 3,029-in a supply theih loh thu leh kg. 41-a rit supply phalsak tura ngenna RD department-ah a thawn. RD department chuan supplier ngenna chu SPAB pawmpuina la loin a pawmsak a, supplier chuan rangva kg. 41-a rit chu bundle 12,546 supply ta a ni.
Rangva supply a nih hun, March - May 2013 chhungin rangva bundle khat kg. 41-a rit chu Rs. 2,616 man a ni a, bundle 12,546 supply-na man chu cheng nuai 328 a ni. Supply order-a tarlan aia man tlawm zawk supply tir a nih avangin supplier hian cheng nuai 52 a hlép a ni.
CAG chuan, RD department hian supplier ngenna pawm ngawt lo hian, supply order-a inziak ang ngei supply tur emaw, tender thar an chhuah tur a nih thu a tarlang a, "Mizoram ang ruahtui tlak tamnaah chuan an rangva supply hian a daih rei lo ang," an ti.