Disaster Management Authority-in Hlimen Quarry-a lung lâk an enfiah

Aizawl District Disaster Management Authority (ADDMA) hotute leh Geology & Mineral Resources (GMR) department hotute hmalaknain Joint Verification Team chuan nimin khan Hlimen-a lung lakna ṭhin quarry chu an enfiah a, dan loa lung la nia sawite chu la tawh lo turin an hriattir.

Aizawl DC pisa aṭanga aṭanga thu dawn danin, Hlimen quarry-ah hian licence nei loa lung la an awm tih report August 8, 2016-ah an dawn avangin a endik turin GMR department chuan Joint Verification Team a din a ni.

Team-ah hian Aizawl SDC R Van-lalsawma chu team leader a ni a; member-te chu - Tlangnuam BDO, Kulikawn Police Station OC, GMR geologist J Chamliana, assistant con-troller of mines Lalremmawia leh mine surveyor Lallianṭhuama te an ni.

Hetihlai hian ADDMA chuan, Tuikual kawngpui chung, Dawrpui West-a Darchhinga in, chhawng 11 ṭhiat tura thupek a chhuah tawhah, in luahtute chu chawlhkar khat dang insawn chhuahna hun an pek belh.

Aizawl additional DC Lalhmun-sanga Hnamte-in Vanglaini palai zawhna chhanga a sawi danin, Gauhati High Court Division Bench-in Darchhinga petition a hnâwl hnuah, ADDMA chuan July 27, 2016 khan Darchhinga in luahtute chu thla khat chhung (August 27 ral hma)-a an in luah chhuahsan turin a hriattir.

August 27 liam hnuah ADDMA hotute chuan in luahtute chu an enfiah leh a, la chhuak lo eng emaw zat an awm. In luahtute'n an harsatnate an lo hrilh a, hun pek belh tura an ngen angin ADDMA chuan chawlhkar khat chhung hun a pek belh a ni.

In luahtute chu August 31, 2016 khan ADDMA hotute hnenah kalin, hun pek belh leh turin an ngen a, ADDMA chuan chawlhkar khat dang, September 9, 2016 thleng insawn chhuah nan hun a pek belh leh a ni.