MBBS leh BDS seat zat a hriat

3rd September, 2016

Mizoramin Central pool-a MBBS leh BDS seat a neih zat tur a hriat tawh a; MBBS-ah seat 25 leh BDS-ah seat pathum a nei dawn.

Higher & Technical Education (HTE) deptt aṭanga thu dawn danin, MBBS leh BDS-a seat neih zat hi nikum nen inang mah se, nikuma seat neihna college pathumah seat hloh a ni a, college dang pathumah seat neih thar a ni thung.

State Medical and Tech-nical Entrance Examinations hmanga Mizoram quota-a MBBS leh BDS zir tura tlingte chu nikuma seat neih mila councelling pek an ni tawh a, college tihdanglam a awm avangin seat thlan ṭhat a ngai dawn a ni.

Seat tihdanglam vang hian rank no. 7 aṭanga a hnuai lam zawng chu seat an thlan ṭhat a ngai dawn a; HTE department chuan chuan September 5, Thawhṭanni chawhma dar 11-ah HTE Technical Wing office, Chaltlangah kal turin a hriattir.