AMC councillor-te Hlawh tihpun rawt a ni

Nimin khan Aizawl Municipal Corporation (AMC) Board of Councillors meeting, Ṭhuampuia AMC pisaah neih a ni a, AMC councillor-te chanvo leh hamṭhatna siam belh leh tihpun an rawt.

AMC BoC meeting hi mayor PC Lalhming-thanga'n a kaihruai a; councillor-te'n thla khata an hlawh mek Rs. 6,000 chu Rs. 30,000-ah tihpun an rawt. Sumptuary allowance Rs. 1,500 chu Rs. 3,000-ah, ward allowance Rs. 2,000 chu Rs. 5,000-ah, transport allowance Rs. 2,500 chu Rs. 5,000-ah, contingency allowance Rs. 1,000 chu Rs. 3,000-ah tihpunte an rawt bawk.

Deputy mayor chenna in cheina, a kum khatna atana Rs. 30,000 hman phalsak mek chu Rs. 50,000-a tihsan a, a hnu lama kum tin Rs. 10,000 hman phalsak chu Rs. 30,000-ah tihpun an rawt a; councillor-te chenna in cheina Rs. 30,000 ni se, an ti a; mayor house rent Rs. 2,000 ni mek chu Rs. 5,000-ah tihpun an rawt bawk a ni.

Board of Councillors meeting-in councillor-te hlawh leh hamṭhatna dang tihpun an rawtna Mizoram sorkar pawmpui tura la thawn tur a ni.

AMC BoC meeting hian Aizawl khawpuia motor parking area ṭhenkhat siam rem ngaite an siam rem a, Parking Regulation pawh eng emaw zat a siam ṭha. Special committee hrang hrang din a remti a; chungte chu - Committee on Control of Parking and Collection of Parking Fees, Committee on AMC Market Committee on Central Mission for Aizawl (AMRUT), Swachh Bharat, Smart Cities, Housing For All), Committee on Sanitation, Solid Waste and Dumping Ground, Committee on Street Light and Display of Advertisement & Hoarding leh, Naming of Streets & Numbering Committee-te a ni.