Goods and Service Tax lak hnuah Bungrua a tlawm dawn - Lalsawta

Finance minister Lalsawta chuan nimin khan Congress Bhavan-a inkhawmah thu sawiin, Goods and Service Tax (GST) hman a nih hunah chuan bungraw man a tlàwm phah dawn thu a sawi a; GST lak hnuah pawh petrol leh zu aṭangin chhiah la lak zel tur a nih thu a sawi bawk.

Lalsawta chuan, April 1, 2017-ah GST hman ṭan tum a nih thu sawiin, hman a nih hunah chuan bungraw hralha a leitu hnuhnung ber state leh Central-in bungruaa chhiah an insem dawn tih a sawi a; "GST hman hunah chuan India ram pumah thil man a tlâwm viau dawn a, Germany leh America-te nen pawh thil man tlàwmah kan inel pha thuak dawn a, kan huphurh ber chu China a ni," a ti.

Bungraw lei hnuhnung bertu state-in Central nena chhiah an insem turah agency neih tam a ngaih dawn thu sawiin, Lalsawta chuan, "Direct-a company-a lei thei tur agency kan neih tam a ngai a, agency ni loin state danga mi kan khâr chhâwn mai mai chuan chhiah kan chang thei dawn lo a, company thlun zawm sumdawng kan tam a ngai dawn," a ti a; GST hman a nih hunah indirect tax a tlem tawh dawn tih a sawi rualin, petrol leh zu-ah chuan chhiah la lak zel tur a nih thu a sawi.

Finance Minister chuan, tuna kalphungah chuan state-in bung-ruaah chauh chhiah a lak thu leh service-ah chhiah lak a nih loh thu a sawi a; GST hman hnuah tha (service) man lak ve tawh tur a nih thu sawiin, "Government of India chauhin service tax a la a, GST-ah chuan Central rualin state pawhin service tax kan la ve tawh dawn," a ti.

Planning Minister ni bawk chuan Aizawl traffic chungchang sawiin, October 1, 2016 aṭanga November 30, 2017 thleng, ni 426 chhungin Aizawla lirthei nei zawng zawngte'n a dahna 'garage' an nei vek tur a nih thu a sawi a; Aizawla veng 84-ah special permit pein, zan dar 10 hnu lama car service tlaivar tur siam a nih tur thu sawiin, "Heng hmalaknate hi a thlawn leh mai lohna turin kum 2018-ah Congress a sorkar leh ngei a ngai," a ti.

New Economic Development Policy (NEDP) chungchangah Lalsawta chuan, NEDP chu NLUP luahlântu ni loin, NLUP finchhuahna a nih thu leh, khaichhuah ngai harsa tak la awmte tan NLUP la pek zel tur a nih thu a sawi.