KHAWTHLIR

Inbuatsaih zel

Kolasib District Level Standing Committee chu Special Summary Revision of Electoral Rolls awm leh tur atana inbuatsaihna kal zelah, nimin khan DC H Lalengmawia hoin DC conference hall-ah an ṭhukhawm a, thil pawimawh hrang hrang an sawiho.

Free clinic

Health department leh Mamit Joint V/C ṭangkawp chuan, nimin khan Mamit Middle School I-ah free clinic an buatsaih. Free clinic neih hmain natna inkai chhàwn theih loh, Non Communicable Diseases Awareness Campaign neih a ni a; inentirte hnenah a thlawnin damdawi an sem. Damdawi man hi bialtu MLA John Rotluangliana'n a tumsak a ni.

Khapna thupek

Traffic SP chuan thupek chhuahin, New Secretariat Complex chhungah taxi-te an stand ni loa din leh bike hmanga thiamthil entir (stunt show) a khap. Thupek bawhchhiate chu MV Act Section 179 hmanga man a hrem theih an nih thu a tarlang.

Building hawng

Kolasib Project Venga Fisheries pisa thar chu, nimin khan Fisheries minister Dr BD Chakma-in a hawng. In hi August 20, 2011-ah sak ṭan a ni a, chhawng hnih niin, a sak nan Rs. 1,23,57,174 hman a ni.

DC-in enfiah

Lawngtlai DC Dr. A Muthamma chuan, Ningani khan Lawngtlai khawpuia sub-centre hrang hrang a tlawh a, an dinhmun a enfiah. Lawngtlai DC chuan Lawngtlai district-a health worker thawk ṭha leh sub-centre tiṭhate tan lawmman siam a duh thu a sawi.

Lei tawlh tlawh

Hunthar Venga lei tawlh chu nimin khan Salvation Army India Eastern Territory aiawhin finance secretary Maj. Ramdinthari Varte, public relations officer Capt. Charles Chalrimawia leh thawktu dangte'n an tlawh a; chhawmdawlna thawktu hnatlang ei leh in tur mamawh – bawnghnute, thingpuife, chini leh chhang eng emaw zat YMA kutah an hlan.