AYUSH Hospital hawn la tum rih lo

Health minister Lal Thanzara chuan nimin khan Thenzawla AYUSH Hospital a tlawh a; pindan hrang hrangte a fang kual. Minister chuan, AYUSH Hospital chu sak zawh leh hman ni tawh mah se, hawng turin thutlukna siam a la ni loh thu a sawi.

AYUSH Hospital-a thawktute nen an inkawmhonaah Lal Thanzara chuan, damdawi-in chu Thenzawl leh a chhehvel mipuite ta a nihna lai a awm tih sawiin, a enkawlna leh thianghlim kawng-ah mipuite'n mawhphurhna an nei tih hriaa thawktute ṭawiawm ṭha turin a sáwm.

Lal Thanzara chuan, Congress kaihhruai sorkarin mipui hriselna a ngai pawimawh tih sawiin, "Nasa taka hmalak mek a ni," a ti a; medical college neih ngei tuma ṭan lak mek a nih thu te, doctor specialist panga lak thar a nih tur thu te, MPSC kal-tlangin nurse 25 lak mek a nih thu leh, health worker 187 lak thuai tum a nih thute a sawi.

Health Minister chuan, AYUSH Hospital hmun atana ram petute chungah lawmthu sawiin, Health department pawhin ram petute hnenah a tih tur a tihfel tawh thu a sawi. Serchhipa damdawi-in sak mekah erawh ram neitute'n harsatna an siam avangin Chief Minister a lawm tawh lo a, tuna an sakna chu kalsana insawn mai tum a nih tur thu a sawi bawk.

Health Minister hi Health principal secretary Dr K Ropari, Health Services director Dr Rohmingthanga Ralte, Hospital & Medical Education director Dr Lalbiakzuala leh deputy director (Ayush) Dr Lallunghnema ten an ṭawiawm a ni.

AYUSH Hospital-a resident medical officer Dr HT Zothanmawia sawi danin, AYUSH Hospital-ah hian August 1, 2016-ah inentirna hawn ṭan a ni a; August thla chhung khan mi 2,506 an inentir a, chungte chu - mipa puitling 726, hmeichhia 1,345, naupang mipa 285 leh hmeichhia 275 an ni. Damlo admit (zan
riahtira enkawl) mi paruk an awm tawh bawk.