Peace Mission-a min mamawhna A nasa tulh tulh - Zoramthanga

MNF president Zoramthanga chuan, remna palai hna a thawhnaah mahni intât lut chawp anga political party
ṭhenkhatin puhna a sawifiah a, "India-in Peace Mission-a MNF President a mamawhna a ni tèlin a nasa tulh tulh zawk a ni," a ti.

Nimina Mizo Hnam Rûna inkhawm-ah thu sawiin, Zoramthanga chuan, Peace Mission chu Foreign Minister, Home Minister, Intelligent Bureau, RAW leh NIA ten an khawih lo tih a sawi a, "National Security Adviser chauhin a khawih avangin PMO-a security officer vel chuan sawi tur an hre lo ang. Minister of State (Home) pawhin a khawih a nih loh avangin a hre hek lo ang," a ti a; National Security Adviser leh amah chiah chu Peace Mission atana India sorkarin a hman mekte an nih thu a sawi.

MNF President chuan, NSCN-K hotupa SS Khaplang be turin India leh Myanmar sorkarin amah an nawr ve ve nia sawiin, "Khaplang hian min be duh ngei tih ka hriat chian phawt loh chuan hma ka la duh bik lo. Palaite ka tir a, Khaplanga chuan ‘Ka mi biak duh berte zinga a mi a ni ang chu,’ min lo ti a, chutiang chuan thu a inchiah mek a ni," a ti bawk.

Hetihlai hian tun hnaia MPCC thuchhuah chuan Zoramthanga’n, “Prime Minister Office (PMO) in Naga hel, NSCN(K) be turin min tir,” tih a sawi hnu hian Asian Age Chanchinbu chuan, “Prime Minister Office in Naga Hel NSCN(K) be turin MNF President, Pu Zoramthanga in tir em?” tiin a zawt a, Prime Minister Office chuan, “NSCN(K) be turin MNF President a tir lova, Home Ministry pawhin a tir lo,” tiin an chhang a, he thu hi August 19, 2016 Asian Age chhuakah an ziak, niin an tarlang thung a ni.