Students Science Seminar buatsaih

SCERT hnuaia Science Promotion Wing chuan, nimin khan Chanmari YMA Hall-ah 'Pulses for sustainable food security: Prospects and challenges' tih thupui hmangin State Level Students Science Seminar an buatsaih a; School Education minister H Rohluna'n a hmanpui.

H Rohluna chuan, science thiam-na tel loin ram hmasawnna a kal thei lo tih sawiin, "Thiamna tipung tura science seminar buatsaih a ni hi a lawmawm a, zirlaite'n an hlâwkpui ngei ka beisei. Kum tin thupui hrang hrangah inelna neih
ṭhin tawh a ni a, presenter-te leh an zirlaipuite hriatna a zauh phah mai bakah, ṭawng thiamna thlengin a pui ṭhin a ni," a ti.

School Education Minister chuan, zirlaite chu hmun dang zirlaite nena inkhaikhin a, hnufual bik anga inngai lo tura chahin, "In thiamna leh ngaihtuahnate chu ram tan ṭangkaia hman theih thil a ni tih hre reng chunga tumruhna nen taima takin zir ang che u," a ti a; hre satliah mai loin, a nihphung chiang taka hriat tum tur a nih thu a sawi.

State Level Science Seminar-a tel tur hian district tina District Level Students Science Seminar neih tawha ti ṭha thlan chhuahte an tel a; state level inelnaa ti ṭha ber chu National Science Seminar-ah Mizoram aiawhin an kal dawn a ni.