Mizoram Sorkarin hmar tlang dungah ADC pe dawn lo: Home Minister

Home minister R Lalzirliana chuan, Mizoram sorkarin HPC(C)-te nen inbiakna an kalpui thu leh, inbiakna chuan inremna tluantling a thlen ngei an beisei thu a sawi a, chutih rualin, autonomous district council (ADC) pek theih a nih loh thu a sawi.

Home Minister hian September 2, 2016-a Champhaia DRDA recreation centre leh rest house a hawnnaa thu a sawiah HPC(D) chungchang a sawi lang a; sorkarin autonomous district council a pek theih loh sawiin, "Sorkar duh dan chiang chiang taka kan puan hnuah inbiakna kalpui a ni a, mipuite nghahhlelh ang ngeia inremna tluantling kan neih ngei ka beisei," a ti.

Mizoram sorkar leh HPC(D) palaite chu August 10, 2016 khan Tourist Lodge, Chaltlangah an lo inbe tawh a; inbiaknaah chuan September 2016 chhunga inbiakna chhunzawm leh tura thu an dah angin, tun thla chhunga inbiak chhunzawm dan tur an bawhzui mek. An inbiakna hmasaah pawh thu inkalh awm loin a kal tluang hle niin Home department hotute hnen aṭanga thu dawn a ni.

Thu dawn danin, HPC(D) hruaitute chuan an thil phût sorkara an thlen tur, Charter of Demand an siam mek a; Charter of Demand chungchangah hian August thla khan John Pulamte kaihhruaiin Demand Drafting Committee an ṭhukhawm a, an thutlukna leh an duh dante chu sorkar an hriattir ang a, chumi hnuah Mizoram sorkarin inbiak chhunzawm leh hun tur a ruahman dawn a ni.

Mizoram sorkar leh HPC (D) te hi remna zawngin August 2013 khan an inbe tawh a, inkahhaina thuthlung pawhsei chungchangah an thu an inhmuh loh avangin inbiakna hi tihtawp a ni. He mi hnu hian HPC (D)-te leh Mizoram police-te chu hmun
ṭhenkhatah an inkap a, nunna chante pawh an awm a, HPC (D) mi leh sa eng emaw zat man an lo ni tawh bawk.

Tun dinhmunah Mizoramah autonomous district council pathum - Mara Autonomous District Council, Lai Autonomous District Council leh Chakma Autonmous District Council a awm a ni.