Supply Minister-in IOC hotute a kâwm

Food, Civil Supplies & Consumer Affairs (FCSCA) minister John Rotluangliana chuan September 2, 2016 khan Silchar Mizoram House-ah Indian Oil Corporation (IOC) hotute a kâwm a; Mizorama eirawngbawlna gas (LPG) harsatna sutkian dan tur a sawipui.

John Rotluangliana chuan, kum kal ta velah IOC-in harsatna lutuk awm loa Mizorama LPG leh tuialhthei an pek avangin lawmthu a sawi a; gas dealer, a bik takin district headquarters-ah tam zawk pe turin a ngen bakah, kumin August thlaa Mizorama gas a harsat chhante a zawtfiah a ni.

IOC hotute chuan, August thlaa Mizorama gas harsat deuh chhan chu carrying contractor-te'n harsatna an siam vang a nih thu an sawi a; Mizoramah dealer dah belh turin an zir chian mek thu te, a theihna hmunah chuan dah belh an tum thu te, a phur tur motor lian an rawih belh tawh a, ṭha taka mipui mamawh pek zel an tum thute sawiin, "Mizoramin LPG tam zawk an dawng tawh ang," an ti.

Inkawmhonaah hian IOC aṭangin senior area manager (LPG) JK Brhahma, seniori retail sales manager RK Mohen Singh, POL sales manager Prahlad Buragohain leh Mizoram rawn bialtu Martin Gangte leh Suman Biswas te an tel a ni.