Hunthar Veng lei a thâwl tih hmuchhuak; NIT-Silchar-ah endik turin thawn a ni

Tun hnaia Hunthar Venga lei tawlh vanga chhiatna thlenna hmun chu Geological Survey of India (GSI) mithiam pahnihte'n an enfiah zo tawh a; lei tawlh leh tlakhniam chhan ber pakhat chu lei a thâwl lutuk vangah an ngai a, leite chu NIT-Silchar-a endik tura thawn mek a ni.

Vanglaini zawhna chhanga Disater Manage-ment & Reha-bilitation (DMR) director C Lalpek-sanga'n a sawi danin, GSI mithiam pahnih - WS Rocky leh G Rongmei te chuan Hunthar Veng lei tlahniam ṭhin hi an enfiah zo tawh a, anmahni pawh Shillong lamah September 3, 2016 khan an haw leh tawh a ni.

GSI mithiamte'n an hmuh dan sawiin, C Lalpeksanga chuan, "Lei a thâwl lutuk niin an hria a a, lei tlakhniamna lai vela in sate thu an zawhnaah pawh, ft. 15 vela thûk lei an laih pawhin lung an hmu lo tih an hrilh hlawm. Lei a thâwl bakah, tui put a awm reng a, chu chuan lei a tinghet lo a, tui paihna drain a ṭha lo bawk," a ti.

GSI mithiamte chuan, lei tlahniam chhehvelah vawk vulh loh te, in lian leh rit lutukte ṭhiah te, tuihâwk luankawr mumal leh ṭha zawk siam te, a chhehvelah balhla leh changél phun lohte an rawt tel nia thu dawn a ni.

GSI mithiamte hian lei tla-hniamna ṭhina leite chu eng emaw zat lâin, National Institute of Technology (NIT), Silchar-a endik turin an thawn a, a result nghah mek a ni. C Lalpeksanga chuan, lei endikna result chu an hmuh thuai an beisei thu Vanglaini a hrilh.

DMR Director chuan, lei endik result an hmuh veleh an ruahman lâwk angin an kal nghal dawn a, DPR an siamṭha nghal dawn tih a sawi a, "Cheng vbc. 15 hû DPR hi kan nei sa a, mahse, soil test result aṭangin tlem tlem kan tidanglam ang a, sorkar laipuiah kan thawn nghal ang," a ti a; DPR tharah chuan tuna lei tawlh vanga harsatna tâwkte chhawmdawlna tur pawh telh a nih dawn thu a sawi.

C Lalpeksanga chuan, tuna lei tawlh tawh chin chhak chiaha in lian tak takte chu ṭhiah ṭha an tih thu a sawi a, "A tinghettu tur nghahchhan a nei tawh lo a, a chim a hlauhawm hle a, a chim palh chuan a chhak zela mite tan a hlauhawm zel dawn. Mahse, in neitute Pi Lalrinawmi'n ṭhiah a la phal bik lo a, ṭhiah mai theih a ni rih lo," a ti.

DMR Director chuan, Lalrin-awmi in chhaka B Sairengpuii in kawt lam, kawngpui chhak velah pawh tuitáipût a awm reng tih sawiin, chungte chu mumal zawka an luan thei nan a luanna ṭha taka siam a ngaih thu a sawi bawk.

Thu dawn danin, DMR de-part-ment chuan kum 2014 aṭang-in Hunthar Veng lei tla-hniam chu an buaipui ṭan a, Architecture Interior Engineering Construction (AIEC) ruaiin a chinfel dan tur an buaipui a ni.