KHAWTHLIR

Teachers' Day

Vawiin September 5 hi Teachers' Day a ni a, he ni pual hian sikul eng emaw zatin hun an hmang dawn. Teachers' Day pual hian Students Self-Support Union (SSU) chuan thuchhuah siamin, zirtirtu zawng zawngte zahna chibai an bûk a, "Kan ram leh hnam rohlu zirlaite chher chhuaktu zirtirtute hi mi tinin an hlutzia hria a, zahna kan lantir fo a pawimawh hle. Zirlaite an enkawlna kawngah zahawm leh mawi taka awm zel turin zirtirtute kan beisei," an ti.

Thisen pe

Inrinni khan Chanmari West Branch KṬP chuan Aizawl Civil Hospital tan thisen unit 48 an pe, a petute mipa 41 leh hmeichhia pasarih an ni a; Vaivakawn Branch KṬP member mipa pariat leh hmeichhia pahnihte'n unit 10 an pe bawk. Chanmari Bial KṬP pawhin Chanmari Kohhran Hall-ah donation camp an huaihawt a, Synod Hospital tan thisen unit 41 an pe a ni.

Thiin chhar

August 24, 2016 aṭanga a awmna chin hriat loh, Lalhmingliana (37) s/o Lalsangpuii, Ṭhuampui chu khawtlangin ni sarih chhung an zawn hnuah nimin khan Durtlang ramah thia hmuh a ni.

Biak-in hawng

UPC (NEI) Ramhlun Kohhran biak-in sak thar chu, Inrinni khan UPC North Mizoram District superintendent Rev. C Lalrammuana’n hawngin, Pathian hnenah a hlan. Biak-in thar lawm nan tlaiah chawhlui an kîlho a ni.

CM tel dawn

Naktuka Kolkata-a Mother Teresa Canonisation Committee-in mi thianghlima Mother Teresa puan lawmna inkhawmah, chief minister Lal Thanhawla chu khuallian tura sawm a ni.

Vatican-ah kal

Nimina Vatican City-a St. Peter's Square, Vatican City-a Pope Francis-a'n Mother Teresa mi thianghlima a puanna inkhawmah Mizoram
aṭangin Roman Catholic Kohhran hruaitute leh kohhran mi eng emaw zat an tel.

Tihdikna

Vanglaini September 3, 2016-a chhuakaCentre for Entrepreneurship Development-in UDPA hnuaia NULM - Self Employment Programme Training pea district pasarih an tuam mek thu tarlanah, a buaipuitu college, Govt. Aizawl College tih chu Aizawl Govt. West College tih zawk tur a ni.