SDR fund invên nan hman phal a ni lo

Disater Management & Rehabilation (DMR) department hotute chuan, chhiat tawhna leh harsatna a thlena ṭanpuina Rs. 4,00,000 an pek chu zangnadawmna ni loin, ṭanpuina liau liau a nih thu an sawi. State Disaster Response (SDR) fund chu chhiatna laka invenna atana hman phal a nih loh thu an sawi bawk.

DMR department hotute chuan, SDR fund chu chhiat tawhna a thlen thulha invên lâwkna atana hman tur a nih loh thu leh Central leh state-in kaihhruaina a siam ang-in, chhiat tâwkte ṭanpuina tur a nih thu an sawi a, "State-in kaihhruaina a siam angin, chhungkuaa eizawngtu ber thi chu sum kan pe tawh a, Mamita pâ ṭha lo ei vanga thi chhungkaw pa ber pawh Rs. 4,00,000-in ràl a ni," an ti a; pa ber chiah ṭanpuina pawisa an pek chhan chu chhungkuaa eizawngtu ber a nih vang leh eizawnga ram lama chhuak a nih vang a nih thu an sawi.

DMR hotute chuan, chhiat tâwk an awma sorkarin sum a pek ṭhin chu zangnadawmna ni loin, ṭanpuina a nih thu sawiin, "Fund hi mi tam takin invên lâwkna tur sum emaw tiin an in leh a vêla chhiatna awm thei siamna atan an dil ṭhin a, lung remna tur te, culvert siamna tur leh thil hrang hrang atan an dil fo a. Mahse, hetiang hi kaihhruainain a phal loh a ni," an ti.

DMR department hotute sawi danin, khuarèl chhiatna leh a kaihhnawih tuartu
ṭhenkhat ṭanpuina an pek ṭhin chu Disaster Manangement Act, 2005 anga kalpui a ni a; hemi chungchangah hian Ministry of Home Affairs (Disaster Management Division) aṭangin April 8, 2015-ah Mizoram sorkar chuan lehkha a dawng.

Central lehkhaah chuan, SDR fund leh National Disaster Response (NDR) fund kaihhruaina leh ṭanpuina pawisa an pek theih tur chi hrang hrang tarlan a ni.

DMR department-in ṭanpuina sum an pekte chu DC office zawng zawnga sum an pek aṭangin district ṭheuha thuneitute'n an lo pe chhuak ṭhin a; DC office lamin sum an neih tlem chuan hmanhmawh taka pek ngai pawh ni se, DMR-ah an dilsak ṭhin.

July 27, 2015-a Mizoram sorkarin SDR fund kaihhruaina a siamah chuan, ṭêkin a den vanga thi te, eizawnna kaihhnawih vanga thih dan pangngai loa thi te, tui lianin a lakte chu an thun belh a ni a; ṭêkin a den hlum zingah ṭanpuina pek tawhte pawh an awm a ni.