Vairengte-ah ILP Cell hawn a ni

Vairengtea Inner Line Permit (ILP) Cell siam thar chu September 2, 2016 khan Kolasib DC H Lalengmawia'n a hawng.

ILP Cell thar hi Vairengte Kawngthar Venga police check gate bulah hawn a ni a; H Lalengawia chuan, Mizoramah hnam dang a duh apiang an lut thei reng tih a sawi rualin, "Mizorama lut turte chuan permit an neih a ngai a, Vairengte aṭanga hnam dang lo lutte'n ILP lak chhuahnaah harsatna eng eng emaw an tawh ṭhin chhâwk zângkhai nan ILP Cell hi hawn a ni," a ti.

Kolasib DC chuan, ILP Cell chu hawn thar chauh a nih avangin hna thawh danah leh rawtna nei tan engtik lai pawhin Vairengte SDO(C) hnenah thehluh theih reng a nih thu a sawi bawk.

ILP Cell hawn thar hi awlsam zawka hmuh a nih theih nan sap
ṭawng, Bengali leh Hindi-in signboard siam a ni a; Kolasib DC office aṭangin duty tur an dah ṭhin dawn. Cell aṭang hian temporary ILP pek chhuah ṭhin a ni dawn a, a hranpaa passport lak ngai loin a hmunah lak nghal theih tura ruahman a ni.