Kum 2014-15 chhungin MPSC-in Hna ruak 375 an hnawh khat

Kum 2014-15 sorkar kum chhung khan Mizoram Public Service Commission (MPSC) sorkar hna ruak chi hrang hrang 375 an hnawh khat.

Mizoram Assembly Emergency Session-a Home minister R Lalzir-liana'n a pharh The 24th Annual Report 2014-2015 of Mizoram Public Service Commission-a a lan danin, kum 2014-15 khan MPSC hian hna ruak hnawh khahna atan exam ṭum 35 a buatsaih a, heng hna ruak hrang hrang diltu hi mi 11,262 an awm a, an zinga mi 387 dilna chu hnawl a ni.

Exam hmachhawntu hi an vaiin mi 11,317 an ni a, interview tura koh mi 1,657 zinga mi 437 chu hna pek an ni a, panel-ah mi 26 dah an ni.

Ram danpui Articel 320-na in thuneihna a pek angin MPSC hian state chhunga hna ruak hrang hrang a hnawh khah ṭhin bakah civil service la turin state sorkar-ah rawtna a thlen thei a ni.

The Mizoram Public Service Commission (Limitation of Funstions) Regulation, 1994 in a sawi angin sorkar hna pay scale Rs. 9,000 leh a chung lam chu MPSC kal tlang veka lak tur a ni.

Kum 2014-15 chhung hian MPSC inrelbawlna atan cheng nuai 611.10 ruahman a ni a, heta ṭang hian cheng nuai 572.49 hman ral a ni a, exam fee leh application form hralh chhuahna atangin Rs. 28,54,000 hmuh a ni.