Political party pahnihin sem policy Hmangin mipui an lilám - Duhoma
MLA aṭanga bàn tâk Lalduhoma chuan, Mizorama political party pahnihin sem policy hmangin mipui an lilám tih a sawi a; MNF sorkar flagship policy hnuaiah chhung tin hnenah Rs. 3,00,000 sem a ni dawn lo tih sawiin, sem policy hmanga buma awm nawn tawh lo turin mipui a chah.
Aizawl South-II bialtu MLA Lalchhuanthanga bultuma nimina Tlangnuam Community Hall-a buatsaih 'Kut hnathawktute chawikanna hun' a hmanpuinaah Lalduhoma chuan, political party pahnihin mipui an lilám nia sawiin, "Sem policy hmangin min inchhàn huai siak a, sem tam intiam apiang kan thlang tling a, an thusawi leh intiam angin an awm ngai lo. Thil theih loh kan inzirtir a, mi ramah an inzirtir ve ngai lo. Kan ram hi develope ila tih aiin, party fund angin thil an kalpui a, hmasawn ngaihna a awm lo a ni," a ti.
Lalduhoma chuan, chhung tin hnena Rs. 3,00,000 sem tura an intiam chu an sem dawn lo nia sawiin, "Kum dangah pawh sem an tiam apiangin an sem kim ngai lo a, sem huna an intiamah an sem ngai hek lo," a ti a; mipuite chu bum nawna awm lo turin a chah. ZPM party chuan sem policy an tuipui lo tih sawiin Duhoma chuan, "Bána kaih policy hmangin a mamawhte kan dâwm chhuak dawn. Nu leh pain naupang bána kàia kal dan an zirtir a, a hnua nu leh pa aia chaka an kal thei ang hian, in bánah kan kâi ang che u a, kal dan kan zirtir dawn che u a ni. Mipui kan harh a hun tawh a, sem policy bànsan a, thawhrimna nena kan dinchhuah theihna tur policy neitute hi min thlan tlin ve a hun tawh a ni," a ti.
Lalduhoma chuan, "ZPM kan sorkar hunah chuan ṭhalai, bul ṭanna tur nei lote tan sorkar chu quarantor-ah a ṭang dawn a ni," a ti a; Israel rama pém thla Mizote'n an awmna sorkar kalphung fel tak an vanneihpui a, hun rei lo te chhungin in leh lo ṭha tak an nei a, Mizoram an ngai tawh lo vak loh ṭhin chhan chu sorkar kalphung felfai vang a nih thu a sawi. MLA aṭanga bàn a nih chungchangah Lalduhoma chuan, Mizoramah amah ang chiaha thlan tlin MLA 42 an awm tawh tih sawiin, "Chumite chungah chuan action lâk a ni lo. Kei chiah hi hetianga bàn awmchhun ka ni. Tuna kan sorkar hrawn mek hi mi MLA-te uirèa lo kuangkuah tawhtu an ni," a ti.
ZPM Legislature Party Leader hlui chuan, "MLA aṭanga min bàn hi ZPM kan sorkar theihna tura Pathian malsawmna emaw tih turin politics ngaihven ngai lote thlengin politics ngaihven phaha, mi khawngaihna ka dawng nasa hle a ni," a ti a; a chunga thil thleng chu AMC election, MLA by-election leh kum 2023 general election-a ZPM an sorkarna tur hmanrua nia a hriat thu a sawi. MLA Lalchhuanthanga chuan a bial Aizawl South-II chhunga mistiri hna thawka eizawng mi 77 hnenah an thâ tihchak nan mistiri bungraw hrang hrang a pe a, chu'ngte chu ZPM president Lalliansawta'n a dawngtute hnenah a hlàn a ni.
Lalchhuanthanga chuan, a thil buatsaih chu a bul ṭanna tur a ni a, mamawh zualpui hmasate pek hmasak an ni tih sawiin, "Kan la pek lohte pawh pek zel a tum ni. Party kan thliar ve lo a, tun ṭumah pawh hian party hrang hranga mite hnenah heng bungruate hi sem a ni," a ti. 'Kut hnathawktute chawikanna hun' tih puala inkhawmah hian ZPM Ṭhalai president Malsawmzuala leh AMC inthlan huna ward XIX-a ZPM candidate tur Baryl Vanneihsangi te pawhin thu an sawi a ni.