Krismas pualin mi 1,091-in thisen pe tawh

Association for Voluntary Blood Donation (AVBD) leh district hrang hranga blood bank-te'n December thlaa 'Krismas pual thisen pek rûnpui' an huaihawtah nimin thleng khan mi 1,091-in thisen an pe tawh. AVBD chuan thisen petute zawng zawng chungah lawmthu an sawi bakah, thisen pek uar zel turin mipui an sáwm.

AVBD thuchhuah tarlan danin, report an dawn chinah, December 1 aṭanga Krismas puala thisen pek rûnpuiah hian nimin thleng khan blood bank 11-ah mi 1,091-in thisen an pe tawh a; thisen petu tamna ber, Aizawl Civil Hospital blood bank-ah chuan mi 508-in an pe a ni.

AVBD leh blood bank-te hian tun December thla chhung zawng Krismas puala thisen pek rûnpui hi huaihawt an tum a, December 1, 2020 Model Blood Bank, Civil Hospital, Aizawlah Health & Family Welfare Board vice chairman Dr ZR Thiamsanga, MLA-in hawngin, a hnuah district dangahte kalpui ve nghal a ni.

Thu dawn danin, District ṭhenkhatah chuan Krismas puala thisen pek hi an khâr tawh a; Aizawlah erawh chuan December 31, 2020 thleng kalpui a ni ang. AVBD chuan, 'Krismas pual thisen pek rûnpui' ah pawl leh mimal ṭhahnem takin blood bank hrang hrangah thisen unit 1,091 an pe tawh chu lawmawm an tih thu an tarlang a, "Mi nunna chhan tura an inpekna a ropui tak zet a, thisen petute zawng zawng chungah lawmthu kan sawi a ni," an ti.

Aizawl bikah 'Krismas pual thisen pek rûnpui' a la kal zel tih sawiin AVBD chuan, "Thisen pe duh tan pek theih a la ni reng a, thisen petute chu ei leh in tur tuihnái tak pek zel a ni," tiin, thisen pe turin Mizo ṭhalaite an sáwm a ni. AVBD chuan, blood bank hrang hranga thisen pekte chu private hospital zawng zawngin an ring ve nghal tih sawiin, "Model Blood Bank, Civil Hospital, Aizawl phei chu private hospital-te'n an ban nasa lehzual a, ni tin thisen unit 80-100 an pe chhuak ṭhin. Hetiang hi kan dinhmun a ni tih hria a, thisen pek uar deuh deuh turin Mizoram pui kan ngen a ni," an ti.

Krismas puala thisen pek tawh zat

(December 1-21, 2020)

#    Blood Bank                            Pe zat

1.    Civil Hospital, Aizawl            508

2.    Synod Hospital                    82

3.    SRH-ZMC, Falkawn            26

4.    Civil Hospital, Lunglei            112

5.    Christian Hospital                12

6.    Champhai Hospital                37

7.    Kolasib Hospital                    80

8.    Serchhip Hospital                96

9.    Siaha Hospital                    94

10.    Lawngtlai Hospital            29

11.    Mamit Hospital                15

    Belhkhawm                            1,091