MPCC President-in mipui duhsakna a hlân

Mizoram Pradesh Congress Committee (MPCC) president Dr Lal Thanhawla chuan Mizoram leh khawvel hmun hrang hranga Mizote Krismas leh kumthar chibai a bûk a; hlim taka hunpui hmang turin duhsakna a hlân.

Dr Lal Thanhawla chuan, Covid-19 hripui léng vangin nunphung a buai nasa a, mi eng emaw zatin an thih phah bakah, ei leh bàr zawnna kawngah pawh harsatna namén lo a thleng tih a sawi a, "Hripui léng avanga Krismas lawmna chi hrang hrang neih theih a ni lo turte hi a pawi tak zet a ni. Kum 2020 hi kum duhawm lo tak a ni kan ti thei ang. Hetiang a nih avang hian ṭanpui ngaite ṭanpui thintu Mizo

Kristiante'n mite ṭanpuina lamah uar zawka hma kan lak a ngai a ni," a ti.

Krismas lo thleng turah lusún chhungte leh hrehawm taka natna khuma mu mekte an hre reng tih sawiin Lal Thanhawla chuan, "Kan ṭawngṭaipui reng a ni. Krismas vuakvêtah sual a zalen lohna atana hun leh thâ sênga duty zawng zawngte ṭhahnemngaihna a ngaihhlutawm ka ti a ni," a ti a; kohhrante'n hripui léng vanga fimkhur tak chunga a remchan dan anga Krismas programme an siamte chu hlawhtling

ngei turin duhsakna a hlàn.

MPCC President chuan, mipui himna tura sorkar, kohhrante leh khawtlang hruaitute thupekte chu zâwm a, tihlawhtlingtu ni tura ṭang tlang turin mipui a sáwm a, "Hripui léng hi Chhandamtu Lal Isua hnena min pawt hnaitu lo ni se. 'Isu, vawinah hian kan thinlung bawng inah, lo piangthar leh la, nang kan chatuan lal turin' tih hla hi a thunawnah i hmang vek ang u," a ti.