AMC-in kum 2014-15 ah tender loin Cheng nuai 1200.38 man hna an pe

Aizawl Municipal Corporation (AMC) chuan, kum 2014-15 chhungin hna tênau (minor work) cheng nuai 1,200.38 man tender chhuah loin mimal hnenah an pe.

Comptroller Audit General of India (CAG) Annual Technical Inspection Report on Rural Local Bodies leh Urban Local Body-in a tarlan danin, AMC hian kum 2014-2015 chhunga tender chhuah loa contract an pek hi hna chi hrang hrang 1,037 a ni a, Rs. 10,000 aṭanga cheng nuai 33.07 man inkar a ni.

Hnate chu chi hrang hrang a ni a; step siam, retaining wall siam, culvert siam, inkal-pawhna kawng siam, vawnbán siam, tuihâwk luankawr siam, vantlang zun-in siam, jeepable road siam leh a dangte a ni hlawm.

CAG report chuan, AMC-in tender chhuah loa hna an pek hian Central PWD Works Manual a kal tlang loh thu tarlangin, "CPWD Works Manual-ah chuan Rs. 50,000 man aia sang contract hna chu hmanhmawh thlak bik emaw, a hnathawh tur mamawhna a sang a nih loh chuan tender chhuah tur a ni," a ti.

CAG tarlan danin, AMC-in kum 2014-2015 chhunga contract an pek 1,037 zinga 840 chu Rs. 50,000 aṭanga nuai 33.07 inkar man a ni a; contract hna 840 thawhna atan hian cheng nuai 1,140.86 hman a ni. Hna chi hrang hrang 840 hi mi 670 hnenah pek a ni a, hnate chu hmanhmawh thlak bik thil a ni lo.

Kum 2014-2015 chhung vekin AMC hian departmental-in hna chi hrang hrang 90 an thawk a, chu'ng hnate chu Rs. 12,000 aṭanga cheng nuai 11.70 inkar man a ni a, contract man zawng zawng belhkhawm chu nuai 88.02 a ni.