Teachers Day vawi 55-na hman a ni Mizo 2-in zirtirtu chawimawina an dawng

Nimin kha India ramah Tea-chers' Day vawi 55-na a ni a, Mizorama sikul hrang hrang leh zirlai pawlte'n zirtirtute chawi-mawina hun an buatsaih.

Teachers' Day-ah hian Mizorama zirtirtu pahnihte chuan President Pranab Mukherjee hnen aṭangin zirtirtu ṭha chawimawina, National Award for Teacher an dawng.

National Award for Teacher hi nimin khan Vigyan Bhavan, New Delhi-ah President Pranab Mukherjee chuan a hlan a; Mizoram aṭanga dawngtute hi Mamawii Higher Secondary School-a lecturer H Ngurthansanga leh Sakawrtuichhun Primary School-I headmistress J Lal-rinmawii-te an ni.

Mamitah chuan Teachers' Day pualin MZP headquarters, Mamit-in kawngzawh an huaihawt a; zing dar 6:30-ah Mamit Charkawn aṭangin Tennis Court thleng kawng an zawh a, Mamita sikul hrang hranga zirlaite an tel.

Kawngzawh tawpnaa inkhawm chu Mamit DC Lalbiaksangi'n a hmanpui a; School Education Minister thuchah chhiar a ni. Champhaiah pawh Teachers' Day pualin kawngzawh huaihawt a ni.

Home minister R Lalzirliana chuan nimin khan Seling YMA Rûnah Seling khawtlang hruaitute'n Zirtirtute Ni hmanna inkhawm an buatsaih a hmanpui. Minister chuan, "Ram hruaitu ropui, sorkar hna lian leh tê zawng zawng chelhtute chherchhuaktu chu zirtirtute an ni a, ram leh hnam siamtute din chhuaktu an nih avangin an pawimawh tak zet a ni," a ti.

R Lalzirliana chuan, zirlaite'n an zirtirtute mizia leh nihna an zir reng tih sawiin, "An nungchang leh awm dan hian kan ram nih zel dan tur a hril avangin ṭawngkam leh nungchangah zirtirtute an fimkhur hle a ngai a, pawlawh taka nun hman a rem lo," a ti a; zirtirtute chu taima tur leh zirlaite entawntlaka nung turin a fuih.

(Phek 2-ah chhunzawm a ni)