ZNP-in an kal zel dan tur An president kutah an dah

ZNP National Executive Committee (NEC) nimina an president Lalduhoma hoa ṭhu-khawm chuan, kum 2018 MLA inthlan turah sorkarna an chan ngei theih nan an President Lalduhoma an ring tâwk a, an kal zel dan tur pawh an President kutah an dah.

ZNP NEC resolution chuan, "Kum 2018 MLA gene-ral election-ah ZNP policy tihhlawhtlin a nih theih nan leh sorkarna kan chan ngei theih nan kan President Lalduhoma kahhruaina kan ring tawk a, kan kal zel dan tur chu kan President kutah kan dah," a ti.

ZNP resolution chuan, Aizawl Municipal Corporation (AMC) hotute'n councillor-te thla tin hlawh Rs. 6,000 aṭanga Rs. 30,000-a tihsan rawtna an pass chu sang uchuak an tih thu a tarlang a; "Central sorkar pawhin hlawh an tihsan dawnin a lêt hnih leh a chanve aia sangin an pun ngai lo," tiin, AMC hlawh pun rawtna chu a let nga vela sang a nih avangin Central sorkar tihdan ang tala tisang ve turin an phût.

Lalduhoma chuan nimina an party pisaa inkhawmah thu sawiin, “Kum 2018 inthlan lo awm turah ZNP tel lohna emaw, a puih loh party chuan tlak an hmabak a, ZNP telna party chuan tlin an hmabak a ni,” a ti a; kum 2013 inthlanah bial 38-ah an mal din a, bial 32-ah chuan ZNP-in vote 1,000-5,000 inkar zel an nei a, ram pumah vote 1,00,000 vel an nei niin a sawi.

ZNP President chuan, “Tun dinhmunah ngawt pawh ZNP hi inthlan lehah opposition lama awm thu a awm lo. A mala din kan zuam lo emaw, sorkar ve hrim hrim kawng kan zawh dawn a nih pawhin ZNP dinhmun hi a chhe lo,” a ti.