MPC-in MR bàn tawh dah lêt leh an phût

MPC party office bearer-te senior vice president Vanlalhlana kaihhruaia nimina an pisaa ṭhukhawm chuan resolution pass in, sorkar sum hman dan dik lo vanga sorkarin sum harsatna a sawi chu an pawm lo tih an tarlang a, "Chhungkaw châwmtu muster roll bân tâkte zawng zawng dah kîr leh se, dan palzût loin dik takin sum hmang tawh rawh se," an ti.

MPC resolution chuan, Mizoram sorkarah sum leh paia harsatna nasa tak avangin sorkar hnathawk tam takin a hunah hlawh an lak theih loh thu leh MR eng emaw zat bân an nih phah thu tarlangin, "Mipui sumte hi dan palzûtin dik lo taka hman a ni ṭhin hian mipui rilru a tina a ni," an ti a; tun hnaia CAG report-ah sorkarin sum a hman fimkhur loh dan leh dan a palzût dan tarlan a nih thu a tarlang.

MPC chuan, Health department-in motor chi hrang hrang 38, cheng nuai 289 séngin an lei tih sawiin, "Truck pahnih leh mini truck pathum, a vaiin cheng nuai 54.99 man chu hmuh loh a ni a, heng motor lei tur hian State Purchase Advisory Board rate bithliah an zâwm lo bawk a ni," an ti.

Mizoram Building and Other Contrac-tion Workers’ Welfare Board-in dik lo takin cheng vbc. 5.14 a hman thu leh sorkar hnathawk pali hnenah a pung awm loin loan cheng nuai 52.38 pe a nih thu an tarlang a; Rural Development department hnuaia rangva supply chu SPAB-in a pawm leh rate bithliah aia hniama supply tír vangin sorkar sum nuai 328 a bothlau thu leh, Dihmunzawla PHE building cheng nuai hnih vela ṭhiah zawh mai theih nuai 63 sênga ṭhiah a ni chu ṭul loa sorkar sum sên ralna a nih thute an tarlang bawk.

MPC party chuan, Zirtirtute Ni-ah zirtirtu zawng zawngte chibai an bûk thu sawiin, "Zirtirtu hrang hrang hlawh la lo zawng zawngte a rang thei ang bera pe turin sorkar kan phût a ni," an ti.