Hunthar Veng leimin tuarte tawrhpui

MNF president Zoramthanga chuan, nimin khan Mizo Hnam Rûna inkhawmah thu sawiin, tun hnaia Hunthar Venga leimin vanga chhiat tâwk chhungkuate MNF-in thinlung taka an tawrhpui thu a sawi.

Zoramthanga chuan, "Kan sorkar loh lai a nih avangin tih vak theih kan nei lo a, chutih laiin, MNF MLA leh AMC-a hotute’n an theih ang angin chhiatna thlengah hma an la tih ka hria a, lawmawm ka ti a. Sorkar lam department hrang hrang hmalakna te, YMA hmalaknate leh Mizo Mizona zâwna chhiat tâwkte ṭanpuitu zawng zawng chungah lawmthu ka sawi a ni," a ti.

MLA Lalruatkima pawhin thu sawiin, August 30-31, 2016 chhunga Legislative Assembly session neih zawh taka Goods & Services Tax Bill chu India Parliament-in a pass tawh avangin danpui khawih thil a nih avangin state sorkar pawhin an pass ve a ngaih thu a sawi a, GST hi India ram pumpui tana
ṭha tura ngaih a ni a, direct leh indirect tax mumal zawka lakna tur a ni," a ti.

Session-a pharh tâk Comptroller and Auditor General of India (CAG) report-ah sorkar dik lohna tam tak a lan thu sawiin, Lalruatkima chuan, "Rural Development department rangva lei dana thil dik lo nasa tak inphúm rùte tarlan a ni a, Health department-a Infant Mortality Rate tih-hniamna tura motor panga sorkarin a lei, a tak hmuh tur awm lo chungchangte pawh tarlan a ni," a ti.

Lalruatkima chuan, Sports department Vision 2016 a hlawhchham avangin sorkarin zah thup nan Mizo nula H Lalruatfeli chu Olympian angin an chawimawi niin a sawi a, "Kan Mizo nula hi India hockey team standby-ah a awm pha a, a chhuanawm em em a, chawimawi pawh a phu em em a ni, a ti a; chutih rualin, Olympian anga chawimawi erawh a dik lo," niin a sawi.