Japanese Encephalitis vei hmu lo

Thosi aṭanga inkai-chhawn theih natna, thluak-a khawsik lut Japanese Encephalitis vei Mizoramah hmuh an la ni lo.

Health department
aṭanga thudawn danin, tun hnai khan Japanese Encephalitis vei nia rinhlelh mi 2/3 vel chu endik a ni a, he natna vei hmuh an la awm lo. Health dept. hotute chuan Japanese Encephalitis vei hi Mizoramah hmuh chhuah a nih pawhin mipui tan hlauh tur a awm loh thu an sawi a, "Hri dang anga awlsam taka inkaichhawn mai theih a ni lo," an ti.

Japanese Encephalitis hi tun hnai khan Manipur-a Churachandpur khawpui leh a chhehvelah a lèn avangin Manipur ramri depa khaw hrang hrang dinhmun zir chiang turin Health Department chuan August ni 9 -11 chhung khan Expert Team a lo tir tawh a ni.

An zir chianna atangin Sakawrdai leh a chhehvel-ah he hri natna pai thei thosi hi hmuh ni mah se, heng thosite hian he natna hi an la pai lo nia hriat a ni. Hetiang natna pai thosiin vawk a sehin vawkah a natna chu nasa takin a inthlahpung a, chu vawk chu thosi-in a seh lehin mihring-ah a kai chhawng thei a ni.

Mihring aṭang chuan thosi hian a put darh theih tawh loh avangin mihring aṭanga mihring veka thosi hmanga kai darh theih a ni tawh lo.