KHAWTHLIR

Kolasib-a Catholic Ṭhalai Pawlte chuan nimin khan Krismas pualin Kolasib District Hospital blood bank-ah thisen unit 17 an pe a, a petute mipa 10 leh hmeichhia pasarih an ni a; mimal thisen pe pali an awm bawk. Lawngtlai Salem ṬKP Unit pawhin Inrinni khan District Hospital-ah thisen unit 12 an pe a ni.

Samaritan Society of Mizoram chuan Krismas thilpek atan Aizawla veng hrang hrang 16-a mi harsate hnenah an local task force kaltlangin hmai tuamna leh hand sanitizer an sem. Samaritan Society of Mizoram hian kum tin khawsak harsate hnenah thawmhnaw an pe ṭhin a, kuminah erawh chuan Covid-19 vanga thawmhnaw sem a remchan loh avangin hmai tuamna leh hand sanitizer an sem a ni.

Mizoram sorkar chuan Deputy Inspector General (Eastern Range) pisa chu Khawlzawlah a sawn dawn. DIG (Eastern Range) hi din thar ni loin, awm tawh sa a ni a, Aizawlah a pisa dah a ni. Champhai, Khawzawl, Serchhip leh Saitual district-te a enkawl dawn.

ṭ

Chief Minister-in a Discretionary Dund aṭanga damdawi-in, jail leh home/centre hrang hranga ṭanpuina tur a pek chhuah chu nimin khan Lunglei leh Champhai district-ah sem chhuah a ni a, a dawngtu turte hnenah hlan a ni.

Champhai Officers’ Club (COC) chuan nimin khan Krismas leh kumthar pualin Champhai khawpuia mi harsa zawkte leh home-te tan luanchhuahna hun an buatsaih. Mazuia Memorial Home (TNT), Vengthlang North hnenah Rs. 10,000 leh Immanuel After Care Centre, Bethel Veng hnenah Rs. 5,000 an pe a, mi pasarih hnenah Rs. 5,000 ṭheuh an pe bawk.

State Referral Hospital-ah mi 18 enkawl mek an ni a, niminah dah luh belh an awm lo. SRH-ZMC Bulletin tarlan danin, Mi 18-te chu Isolation ward-a awm vek an ni a, mi panga chu oxygen hmanga enkawl an ni. SRH-a hripui vei enkawl mek zingah hian kum 60 chung lam mi pathum leh kum 14 hnuai lam pahnih an tel.