Khawpui 6-ah lirthei khû endikna hawn a ni Hmasawnnain pollution-ah harsatna a thlen - Transport Minister

Transport minister TJ Lalnuntluanga chuan nimin khan a pisa aṭangin district headquarters paruk - Siaha, Champhai, Kolasib, Serchhip, Lawngtlai leh Mamita Pollution Testing Centre (lirthei khû endikna) bun tharte a hawng a, hmasawnnain pollution lamah harsatna a thlen thu a sawi.

Transport Minister chuan khawvelin hmasawnna a tawn chhoh zel thu sawiin, "Hmasawnna hian zangkhaina leh awlsamna min thlen a ni. Chutihlaiin hmasawnna thar hian thil ṭha a keng vek loa, thil ṭha lote pawh a keng tel ve ṭhin. Khawl leh lirthei lama hmasawnna hian engkimah awlsamna min thlen rualin, pollution lamah harsatna min thlen a ni," a ti.

TJ Lalnuntluanga chuan, lirthei neituten registration leh insurance an tih dawnah harsatna an tawh loh nan pollution free certificate pek chhuahna leh boruak chhia siam thei lirthei uluk taka vil a nih theih nan The Motor Vehicle (Amendment) Act, 2019-in a phût angin, district transport officer enkawlna hnuaiah Pollution Testing Centre parukte chu hawn a nih thu a sawi.

Pollution test-in ngaih pawimawh a hlawh tial tal tih sawiin TJ Lalnuntluanga chuan, "Ram changkang apiangin pollution an vei. Court lamah pawh Supreme Court thlengin an ngai pawimawh. State sorkar pawhin ṭha zawka pollution endik a nih theih nan theihtawp a chhuah a ni," a ti.

Minister chuan, Mizoram Pollution Control Board (MPCB) lamin Transport department-a thawktute technical training an pek thu a sawi a; Khawzawl, Saitual leh Hnahthial district-ah chuan DTO an la awm loh avangin Pollution Testing Centre neih a la nih loh thu leh nei tura hmalak a nih thute a sawi bawk.

Transport Minister sawi danin, pollution endikna khawl neih a nih hnuah a dahna turah harsatna a awm a, petrol pump bula dah chu duhthusam ni mah se, a rem lo. Chuvang chuan, district khawpui parukah hian DTO pisaah an dah. Pollution Testing Centre-te hi Transport department leh MPCB ten an din a ni. 

Hawnna inkhawm kaihruaitu Transport director R Lalrammawia sawi danin, Pollution Under Control Certifcate (PUCC) tel lo chuan lirthei fitness certifcate leh insurance pek chhuah theih a ni tawh lo. Chu vang chuan district hrang hrangte'n harsatna an tâwk a, sorkar chuan endikna hmun tam zawk a awm theih nan hma a la a ni.

Aizawl leh Lungleia Pollution Testing Centre awm mekte chu Transport dept.-in dan anga an remtihnain MPCB enkawl a ni a, hmun ruka dintharnaah pawh department leh MPCB-te hi an thawkho a ni.