Aizawlah dengue thehdarhtu thosi a awm Health dept-in chî-ai lo turin mipui an ngen

Health department hotute chu nimin khan principal director Dr K Ropari hoin tunlaia Aizawl veng ṭhenkhata dengue léng nia hriat ngaihtuahin an
ṭhukhawm. Aizawl hmun ṭhenkhatah dengue thehdarhtu thosi a awm ngei tih finfiah a nih tawh thu an tarlan rualin, mipuite chî-âi lo turin an chah.

Health department chuan, dengue natna chu khawsik, lu ná, mitmu ná, taksa ruhrel leh tihrâwl ná, taksa bawl leh vual thaktein a lang chhuak tlangpui tih an tarlang a, "Heng bakah hian pum ná, luak leh taksa aṭanga thi chhuakte a awm thei a, hetianga na an awm chuan a rang thei ang bera damdawi-in pan tur a ni. Damlo na zual lem loah chuan na châwkna Paracetamol bak ei loh a him ber. Chaw leh thil tuirîl tam thei ang ber ei tur a ni," an ti.

Damlo zawng zawngte dengue natna a ni vek lo tih sawiin, Health department chuan, "Dengue anga lang chhuak ve thei viral fever (tlang hrileng) leh natna dang tam tak a awm avangin dengue anga ngaih vek a ṭha ber lo," an ti a; chutih rualin, dengue natna theh darhtu thosi (Aedes thosi)-te chu Mizoramah an awm ve ngei a, Aizawl hmun ṭhenkhat bikah an awm ngei tih finfiah a ni tawh tih an tarlang.

Health department thuchhuah tarlan danin, tun hnaia hri léng bika thisen endik tawh mi 46 an awm a, chu'ng zinga mi pahnih chuan dengue an vei tih ELISA Reader hmanga finfiah a ni.

Kum 2012 aṭangin ELISA reader hmangin Aizawl Civil Hospital-ah endik ṭan a ni a, dengue vei mi 76 hmuh chhuah a ni tawh.

Dengue thehdarhtu thosite chu tê tak tê, a dum leh vára ṭial a ni a, khaw ên laia mi seh chi niin, a bikin zing karah leh tlai lamah mi an seh duh bik. Thosi pakhatin a puar khawp hmu turin mi sawm tal a seh a ngai tlangpui a; in chhunga châwl chi an ni ve vak lo a, thlâwk kual reng chunga mi seh chi an ni.

Health department chuan entomological, environmental leh epidemiological sur-veillance uluk takin an kalpui reng a; state dang aṭanga Mizorama lutte enfiah turin Lengpui Airport-ah doctor leh thawktu dangte an duty reng a ni.

Health department chuan, dengue thosi lakah invèn a harsa lo tih sawiin, "Kan in leh a vela tui tlin theihna tihbo te, thosi seh lak aṭanga invenna, thosi hnawhbona leh thahna hlo hman te, taksaa chulh chi Odomos hman te, kawr bán tlawn leh kekawr tlâwn phui
ṭha hâk te, chhûn mutnaa thosi lèn zârte a ni," an ti.

Mizoram leh Dengue

Kum Enfiah Dengue Dengue

Zat Vei zat Thihpui

2012 90 6 NIL

2013 96 7 NIL

2014 246 19 NIL