Assembly Dy. Speaker hlui LP Thangzika a thi

Mizoram Legislative Assembly deputy speaker hlui LP Thangzika (92), Lunglei Venglai chu nimin zing dar 4:50 khan a thi a, nimin vek khan vui a ni.

LP Thangzika hi March 15, 1924-ah Rabung, Champhai district-ah a piang a, zirna lamah pawl 3 zoin, kum 14 mi a nihin a ramṭang. A ú, Buangthanga nen an sumdawng ṭhin a, kum 1946-ah Aizawlah pémin, Bara Bazarah sumdawnna an chhunzawm a ni. Kum 1957-ah Lungleiah pém lehin, Lunglei Venglaiah an inbéngbel a; kum 1975-ah BCM Lunglei Venglai kohhran upa atan thlan a ni.

Kum 1972-ah Mizo Union divisional president a ni a, kum 1972-ah Hnahthial bial aṭangin MLA-ah thlan a ni. Kum 1993-ah Hnah-thial bialah bawk MNF candidate niin thlan tlin a ni leh a, Lunglei district High Powered Committee vice chairman a ni. May 27, 1998-ah Assembly deputy speaker mawhphurhna a chelh leh a; Assembly rorel inkhawm ṭum riat a kaihruai hman.

MNF party chuan thuchhuah siamin, LP Thangzika chu Zo fate tana a theihna nasa taka hlântu a nih thu leh a thi chu pawi an tih thu an tarlang a,"LP Thangzika kan chán ta hi Mizo hnam tan chànna nasa takah kan ngai. A kalsan tak a chhungte leh amah hmangaihtu zawng zawngte thinlung takin kan tawrhpui a ni," an ti.