Lalchamliana'n a bialah thil 3 a hawng

Hrangturzo bialtu MLA Lalchamliana, Home minister chuan nimin khan a bial chhung Khawlailung dáia Ralkahkawn Bazar leh Léng khuaa khualbuk leh ambulance tharte a hawng.

Ralkahkawn Bazar a hawnaah Lalchamliana chuan, chhungkaw 10 velin kumtluana eizawnna atan an hman theih tur bazar thar an nei chu a lawmpui thu sawiin, ṭangkai taka hman a nih theih nan duhsakna a hlàn a, "Fu chíngtute tan fu herna khawl ngaihtuah mek a ni," a ti. Bazar hi Rurban sum Rs. 4,70,000 leh Lalchamliana MLA fund Rs. 50,000 hmanga sak a ni.

Léng khuaa ambulance leh khualbûk hawnna inkhawmah Lalchamliana chuan, sorkar ṭanpuina ngawta innghat loa khawtlang mipui inpekna chu chhuanawm a tih thu a sawi a, "Léng aṭangin mi chhuanawm leh hmingṭha tak tak an lo chhuak tawh ṭhin. Vawiina mite pawh entawn tlak ni zel turin in thawk niin ka hria a, ka lawm hle a ni," a ti.

Leng VC president B Vanlalfinga sawi danin, ambulance leina sum zinga 60% chu Automobile Dealer Association of Mizoram (ADAM)-in Corporate Social Responsibility (CSR) hmanga an thawh a ni a, 40% dang chu vantlang ram Jio company-in tower dah nana an luah hawh man te, State Finance Commission Grant VC-in an thawh aṭanga an hmuhte a ni.

Khualbûk chu bialtui MLA hlui D Thangliana'n a hun laia MLA fund aṭanga a thawh Rs. 2,00,000 hmanga bul ṭan a ni a, SIRD-in Panchayati Learning Centre-a a thlan avanga Rs. 5,00,000 a pek leh VC-in sum a dap khawm leh mi tlawmngaite thawh khawm hmanga siam zawh a ni.