Zu zawrh duh loh vangin MNF-in District capital tinah kawng an zawh dawn

Mizo National Front (MNF) party chuan Mizoramaa zu zawrh duh lohna lantir nan, September 15, 2016 khian Aizawl leh district khawpui hrang hrangah kawng an zawh dawn.

MNF thuchhuah tarlan danin, zu zawrh duh lohna kawngzawh hi Aizawlah chuan Chanmari kâwnah ṭanin, Vanapa Hall kawt thleng an nei dawn a, an party hruaitute'n thu an sawi ang.

District headquarters-ah pawh hmun rem-changah kawngzawh a ni dawn. MNF chuan, an kawngzawhah hian zu zawrh vanga tuartu chhungkua te, kohhran, tlawmngai pawl hrang hrangte leh zu zawrh duh lo apiang tel turin an sáwm.

MNF chuan, Congress kaihhruai sorkarin kohhran leh pawl hrang hrangte'n nasa taka an dodal chunga MLPC Act hmanga March 15, 2015 aṭanga zu an zuar chu an dem thu leh Mizoramah zu vanga buaina leh thihna a thlen tam phah niin an tarlang a, "Zu vanga damdawi-in pantu ni tin an tam hle a, chhungkaw kehchhia te, hmeithai leh fahrah lo pung te, lusûn chhungkua tam ta lutukte hi pawi kan ti tak zet a ni," an ti.

MNF chuan, zu do zawnga thu sawi pastor-te chhuia dap chhuak tura hma an la te, kumtlinglo sikul naupangte'n uniform nena zu an lei leh an in te, Mizoram páwnah zu zawrh vanga sum tam tak a luang chhuakte chu pawi an tih thu an sawi bawk.

Mizoram sorkar chu zu chhiah ît-ah puhin, MNF chuan, "Zu zawrh vanga kan khawtlang nun tluchhe mek te, MLPC Act kenkawh zawh loh vanga kan ram, kan hnam leh sakhaw tan chhiatna naménlo lothleng mekte hi kan duh loh em avangin 'Zu zawrh duh lohna kawngzawh' kan buatsaih dawn a ni. Sorkar hian zu a zawrh dawnah tumah ràwn
ṭul a ti lo a, ama thuin a titlang lui a, mipuia thiam chan nan MLPC Act zir chiangtu Review & Evaluation Committee a din lehte hi ṭul lo kan ti a, tumah ráwn kher loin ama thu ngeiin zu zawrh titawp nghal turin kan phût a ni," an ti.