Dan pawm tawh rules nei lo an awm Mimal damdawi-in tan dan siam duh

Mizoram State Law Commission (MSLC) aṭanga thu dawn danin, Mizoram Assembly House-a dan pass tawh si, hman a nih theihna tura rules siam loh a awm ṭhin. Hetih lai hian, MSLC chuan mimal damdawi-in khuahkhirhna dan siam a nih theih nan hmalak an tum.

Vanglaini palaiin a kawmnaah MSLC chairman John Siamkunga chuan, Mizoram Assembly House-ah dan pass mah se, rules tur siam si loh eng emaw zat a awm tih a sawi a, "Kan buaipui tur ni chiah lo mah se, Assembly House lama a buaipuitu turte nen inberáwnin, rules eng emaw zat chu siam thar leh a ni," a ti.

John Siamkunga chuan, Mizoramah dan eng emaw zat siam ṭhat ngai leh hman a nih tawh loh vanga paih ngai a awm tih sawiin, "Department-in dan chi hrang hrang an neihte zir chiang tur ruatin, zir chian a ni a, dan paih ngai leh siamṭhat ngai a tam," a ti a; MSLC ṭhutkhawm leh hunah dan paih ngai paih a, siamṭhat ngai siamṭhat tura department-a thlen theih a nih tawh tur thu a sawi.

MSLC Chairman sawi danin, dan tam tak chu tun dinhmuna hman ngai tawh lo a ni a, chu'ngte hi paih tum a ni. Dan ṭhenkhat chu hman khát deuh mah se, hman ṭul hun la awm thei a awm a, chu'ngte hi chu siamṭha deuhin hman zel an tum. Dan ṭhenkhat chu department-te nena inberáwn a, paih a nih dawn leh dawn loh zir chian ngaite a ni.

Sorkar laipuiin dan a hman tawh si loh paih ngai a tam vanga hma la tura an tih angin department-in dan an neihte chu an zir chiang tih sawiin John Siamkunga chuan, "Sorkar laipuiin dan an rawn paih nghalte a awm a, ṭhenkhat chu en zui tura an rawn tihte pawh a awm," a ti.

John Siamkunga chuan, mimal damdawi-in duh duhna hmuna din a, a awm man inang lote chu an ngaimawh thu sawiin, "Mimal damdawi-in din a nih dawna an zawm tur dan leh a khuahkhirhna dan kan neih a ṭulin kan hria," a ti a; mimal damdawi-in khuahkhirhna dan siam a nih theihna atan a kaihhnawih department-te an biakràwn tur thu a sawi.

Department dan hrang hrangte'n chak tâwk lohna lai an nei em tih leh siam ṭhat ngai a awm em tihte an en mek thu sawiin MSLC Chairman chuan, "Dan chak tâwk lo leh siam belh ngaite kan en zui ang a, department-te nen inráwnin dan ṭha tak kan neih theihna atan hma kan la zel ang," a ti.