HPC (D)-in an thil phûtte Mizoram sorkarah an thehlut

Hmar People Convention (Democrats) chuan, sorkar nen an inbiak leh huna an thil phût hrang hrang sawiho turte Mizoram sorkar hnenah an thehlut tawh.

Thu dawn danin, HPC(D)-te hian August 10, 2016-a Mizoram sorkar nena Tourist Lodge, Chaltlanga an inbiaknaa an thu dah angin, an inrâwnkhawm hnuah an thil phût leh duh dan hrang hrangte chu ziakin Mizoram sorkarah an thehlut. An thu thlen zingah hian kum 1994-a HPC leh Mizoram sorkar inkara remna thuthlung lo siam tawh tihchak leh tihchangtlunna tur a tel.

HPC(D)-te thil phût chungchangah hian August 13, 2016 khan Churachandpur-ah Hmar hnam pawl hrang hrang aiawhte an inhmu khawm a; Mizoram sorkar nen an inbiak leh huna sorkara an thlen tur ngaihtuahtu pawl, member pariat awmna Demand Drafting Committee an din a, John Pulamte chu convener atan an ruat. Committee hian inbiakna chhunzawm leh huna an thil ngaihtuah tur a ruahman a ni.

An thu thehluh hi sorkar aiawhin Home department chuan an dawng a; hetih lai hian, HPC(D) leh Mizoram sorkar inbiak leh hun tur tihfel a la ni lo a, September thla laihâwl emaw, thla tawp lamah emaw ruahman tum a ni.

Mizoram sorkar leh HPC(D) hotute hi August 10, 2016 khan chawhma dar 11 aṭangin Tourist Lodge, Chaltlangah an inbia a; September 2016 chhunga inbe leh turin thu an dah.

Inbiaknaah hian Mizoram sorkar aiawhin Home depart-ment-a additional secretary
Lalbiakzama, CID (Special Branch) SP RD Chawngthu, Home department joint secretary Lalhriatpuia leh under secretary David H Lal-thangliana te an tel. HPC(D) aṭangin team leader chu Lalṭhalien a ni a; team member-te chu - Dr John Pulamte, Rohringa, Lalthlamuana Hmar, Francis Songate leh Thangliensung te an ni.

Inbiakna hi boruak zalen taka neih a ni a; Mizoram sorkar aiawhte hotu Lalbiakzama chuan Vanglaini zawhna chhangin, inbiaknaa HPC(D) lamin an thil duh leh phût an sawite chu sawi chhuah a la rem lo tih a sawi a, "Hmasawnna erawh chu kan neiah kan ngai," a ti.