District tharin a ken tel ramri leh ṭul dangte buaipui nghal a ni - Tawnluia

Deputy chief minister Tawnluia chuan, kum 2019 budget session-ah Chief Minister-in district thar pathum hawn nan sum nuai 150 dah a nih thu a puan aṭangin district tharin a ken tel tur ramri leh thil pawimawh dangte buaipui nghal a nih thu a sawi.

Tawnluia hian nimina a bial chhunga awm Khawzawl district lawmna puala buatsaih souvenir, a pisaa a tlangzarhnaah thu sawiin, "August 12, 2019-ah Khawzawl DC office hawn a ni a, November 6, 2019-ah Chief Minister hoin Khawzawl district lawmna neih a ni," a ti.

District thar pathum hawn aṭanga tun thlengin Khawzawlah Sport & Youth Services, UDPA leh department dang hnuaiahte hmasawnna hmel thar ṭhahnem tak hmuh tur a awm tawh tih sawiin, Tawnluia chuan, "Khawzawl mipuite'n hun rei tak district hran nei tura kawng hrang hranga an beihna lo hlawhtling ta hi ka lawmpui a che u," a ti a; district nei tura beitute leh an tawrhnate hriat reng a nih thu a sawi.

Dy. Chief Minister chuan, ram tana rawngbawl tura amah thlangtu mipuite'n damlohna vanga a inenkawl chhung zawng duhsak taka ṭawngṭaina nen an dinpui tlat avangin a lawm thu a sawi a, "Ka tana mi tam tak ṭawngṭaina avangin ram leh mipui tana hna thawk thei leh turin Pathianin chakna a pe niin ka hria," a ti.

Souvenir tlangzarh inkhawmah hian minister of state Robert Romawia Royte, MLA pali - Dr ZR Thiamsanga, C Lalmuanpuia, Dr K Pachhunga leh Zothantluanga te pawh an tel a ni.