Subsidy dilpuinaa document ngaite Mizo Carbon-in an nei - Industries dept.
Industries department hotute chuan Vanglaini zawhna chhangin, M/s Mizo Carbon Product chu sorkar laipuia subisdy dilsak tura document ngaite an neih vek thu an sawi. Hetih lai hian, Mizo Carbon-in subsidy dilpui tura an ngenna hnuhnung ber chu ngaihtuah a ni tawh lo.
Industries department hotute hnen aṭanga thu dawn danin, Mizo Carbon Product hian Central Capital Investment Subsidies (CCIS) leh Central Transport Subsidy (CTS) dilpuina tur atana document pawimawh zawng zawng an nei. Industry hian Meghalaya aṭanga lungalhthei (coal) leina, Assam checkgate an paltlangna, Taxation department-a pek ngai an pekna leh bank aṭanga document pawimawh neih ngaite an nei vek a ni.
Subsidy dilpui tura ngenna an pawm dawnin lehkha en chunga kal an nih thu sawiin Industries department hotute chuan, "An document-te a dik leh dik lo enfiahtu kan ni lo a, a enfiahtu chu a hranin an awm. Document pawimawh zawng zawng an neih vek chuan State Level Committee (SLC) tan lo hnâwl ngawt theih a ni lo," an ti.
Industries department hotute sawi danin, sorkar laipuia subsidy dilpui tura ngenna an dawnin, SLC chuan lehkha an neihte an zir chiang a, dilpui tlaka an ngaih chuan an dilpui ṭhin. Dilna ṭhenkhat, an lehkha fel tâwk loh vanga hnâwlte pawh an awm a, ṭhenkhat chu hnâwl an nih hnuah pawh lehkha pawimawhte an tihfel leh chuan dilna thawnpui leh tho an ni.
SLC-in subsidy dilpui tlaka an ngaihte chu Ministry of Commerce and Industry hnuaia Department of Industrial Policy & Promotion (DIIP)-ah an thawn ṭhin. DIIP chuan dilpuina lutte chu an lehkhate an zir chian hnuah subsidy pek tlaka an ngaih chuan an pe ṭhin a; chutih rualin, SLC-in a dilpui
ṭhenkhat hnawlte pawh an awm.
SLC-ah hian DIIP aiawhte an tel ve ṭhin mah se, tun hnai khan DIIP aiawhte telh an ni lo. SLC-in dilpuina a thawnte DIIP-in an endik leh vek tho ṭhin avangin, SLC-a DIIP mi leh sate telh kher ṭul loah an ngai a ni.
Tun hnai khan SLC chuan subsidy dilpui tura ngenna lutte an ngaihtuah a, chu'ng zinga eng emaw zat chu an pawm. Mizo Carbon Product-in CTS atana cheng vbc. 10.34 dilna an thehluh erawh ngaihtuah tel a ni tawh lo. Industries department hotute chuan, Mizo Carbon Product chungchangah Anti Corruption Bureau (ACB) thu leh hla an ngaihchân thu an sawi.
Mizo Carbon-in CTS leh CCIS dik lo takin a dil nia sawi awm chu June 13, 2016-a Council of Minister thutlukna angin, chief secretary Lalmalsawma'n chhui chiang turin ACB a hriattir a ni.
Chief Secretary hian ACB hnena Mizo Carbon Product-in subisdy a hmuh dan chhui chiang tura a hriattir rual hian, Industries Secretary chu Mizo Carbon-in CTS leh CCIS a hmuh theihna tura dilpuina, sorkar laipuia a thawn bawhzui lo turin a hriattir bawk.
Chief Secretary hian Mizo Carbon Product chhui chiang tura hriattirna hi ACB hnenah June 2016 khan a thawn a; he thu ziah lai thleng hian ACB hian preliminary inquiry an la ti zo lo.
RTI Act hmanga Vanglaini zawhna Industries department-in an chhan danin, January 1, 2013 aṭanga September 30, 2014 inkar chhung khan Mizo Carbon Product, Industrial Growth Centre chuan CCIS atan cheng nuai 93.90 leh raw material phurh
ṭanpuina CTS atan cheng vbc. 2.47 dilna District Industries Centre, Aizawlah an thehlut a; an dilna chu SLC-in ngaihtuahin, an dil zat ang sorkar laipuiah an dilpui a ni.
Hetih lai hian, Central YMA chuan Mizo Carbon Procuct chu an zir chiang a, an zir chianna aṭanga Central subisdy an hmuh danah thil felhlel a awm ngeiin an hria a, August 14, 2014 khan Industries Minister, Parliamentary Secretary (Industries), Industries Secretary leh Industries Director hnenah chhui chiang tura ngenna an thehlut.
CYMA chhui dan chuan, Mizo Carbon Product hian Khliehriat, Meghalaya aṭangin Luangmualah October 1 - December 31, 2012 chhungin lungalhthei metric ton 3,690 phur lut angin CTS an dilnaah an tarlang. Truck 363-in metric ton 9 zel phurin Cachar an phur thleng a, Cachar aṭangin truck 222-in IGC, Luangmual an phur thleng leh a; an phurh man zawng zawng chu Rs. 1,16,84,250 a ni.
Lungalhthei phurh nana transport company an hman an ziah lan chu Zoram Transport Company, Zemabawk a ni a, mahse Zemabawk Local Council leh YMA-te'n an vengah Zoram Transport Company an hmu zo lo. August 2013 aṭangin Zarkawtah an insawna sawi a ni.
Mizo Carbon Product chuan lungalhthei an siam chhuah metric ton 321.26, Rs. 26,23,023 man chu Central Lime Industry, Lengpuiah an hralh niin an an tarlang.
Mizo Carbon Product-in September 31 - December 31, 2012 chhunga diesel Rs. 1,27,447 man, Hauva Filling Station-a lei angin an insawi a; mahse, Hauva Filling Station manager Pandey chuan an hnen
aṭangin diesel an lei loh thu a sawi thung.
4 Industries dept-in Mizo Carbon Procuct-in subsidy dilpuina atana document ngaite an neih vek thu an sawi.
4 Industries dept. chu document dik leh dik loh chhui chiangtu an ni lo a, document base-a kal an nih vangin document-a an neih vek chuan subsidy an dilpui ṭhin.
4 Chief Secretary-in June 2016-ah Mizo Carbon Product chhui chiang tura hriattirna ACB-ah a thawn.
4 ACB-in preliminary inquiry an la ti zo lo.
4 CYMA-in August 14, 2014-ah Industries Minister, Parliamentary Secretary (Industries), Secretary leh Director hnenah Mizo Carbon chhui chiang tura ngenna an thawn.
4 CYMA-in Mizo Carbon Product-te'n transport company an hman nia an sawi an hmu zo lo.
4 Diesel Rs. 1,27,447 man an leina nia an sawi Hauva Filling Station-in an lei loh thu an sawi.