Minority scholarship kalphung thar Inhrilhfiahna hun Champhaiah buatsaih

Mizoram Scholarship Board (MSB) chuan, nimin khan Champhai I&PR auditorium-ah Champhai leh Khawbung block-a sikul hrang hrangte tan minority scholarship chungchang inhrilhfiahna hun an buatsaih.

Zirtirna petu MSB technical officer Lalmuankima Sailo chuan tun hmaa minority scholarship dilna, application form hmanga thehluh ṭhin chu kumin aṭangin online veka kalpui a ni tawh dawn tih sawiin, "Sikul hrang hrangte chuan hemi kawngah hian mawhphurhna an nei lian dawn hle a ni," a ti.

Nikum khan online hmang hian high school leh a chunglamte chu scholarship hi diltir an nih thu sawiin, "Anmahni-in thil engkim an buaipui a ni. Kuminah chuan primary leh middle school te pawhin online hmanga an dil a ṭul tawh dawn bakah, sikul hnenah application an thehlut ang a, dilna hi sikulin a endik hnuah application dik nia a hriatte chu pawmin online hian a dilsak thei dawn," a ti a, zirlai application dik loa dilsak an awm a nih chuan sikulin mawh an phur tur thu a sawi.

Training-ah hian Champhai leh Khawbung block-a primary, middle leh high school zawng zawng aṭangin aiawh pakhat ṭheuh kokhawm an ni a, an thil hriat duh an zawhte chu MSB hotute'n an chhang a ni.