Buhfai supply chungchangah MIZOFED-in High Court-ah sawifiahna a la thehlut lo

Gauhati High Court-in open market-a Mizoram sorkar (Food, Civil Supplies & Consumer Affairs)-in buhfai supply tura MIZOFED hnena supply order a pek chhan sawifiah tura a hriattir angin, sorkar ukilte'n High Court-ah sawifiahna lehkha an thehlut tawh a; MIZOFED-in an la thehlut ve lo.

Tarlan tawh angin, Mizoram sorkarin buhfai supply tura MIZOFED a thlan dan chu tender chhangtu mi 10 vel intélkhawmin Gauhati High Court-ah an khing a, High Court chuan Mizoram sorkar leh MIZOFED-te chu August 31, 2016 ral hmaa Court-a insawifiah turin a hriattir a ni.

High Court-a PIL thehluha hming tumtute chu - Philip Lalawmpuia, Tuikual; Laldawngliana, Keifang leh Lalrinchhuanga, Bilkhawthlir te an ni a, August 18, 2016-ah High Court-ah petition an thehlut.

Court-a petition thehluttute ukilte hnen aṭanga thu dawn danin, FCSCA department-in Court-ah sawifiahna thehlut tawh mah se, MIZOFED-in an la thehluh ve loh avangin thubuai hi ngaihtuah chhunzawm theih a la ni lo. Thubuai hi High Court-in tun karah a ngaihtuah hman an beisei thu leh chinfel thuai tura tih a nih thu an sawi.

FCSCA department-a buhfai supply tur hian mi 29-in tender an chhâng a, chu'ng zinga mi 20 chuan tuna MIZOFED-in a supply-na rate, quintal khatah Rs. 2,500 aia tam loin an chháng a, Rs. 2,450-a supply tura chhángte pawh an awm. Mizoram sorkar erawh chuan, tender chhangtute chu tumah thlang loin, tender chháng ve lo MIZOFED chu buhfai quintal khat Rs. 2,500-a supply turin a ti a ni.

Supply department-in MIZOFED hnena buhfai supply order a pekah chuan, September 2016 ral hmaa buhfai qtl. 1,03,000 Mizoram sorkara pe tur leh, September thla hnuah chuan thla tin qtl. 65,000 pe tura tih a ni.

MIZOFED hian Mizoram sorkarah buhfai quintal 70,000 vel an pe tawh a; September chhungin quintal 33,000 vel pek tur an la nei a ni.