Mother Teresa kha mi tam tak nuna Beiseina siamsaktu a ni - CM Hawla

Chief minister Lal Thanhawl-a chuan, Mother Teresa chu nun tláwm tak ni mah se, a ropui a, amah aṭangin zir tur tam tak a awm tih sawiin, "Mi rethei, rahbi tleu leh chanhaite tana a inpekna, a rawngbawlna leh an tana a hna thawh ropui khan mi tin rilru a hneh a, mi tam tak nun-ah beiseina siamsaktu a ni," a ti.

CM Lal Thanhawla hian September 6, 2016 tlai khan Mother Teresa International Award Committee-in Mahajati Sadan, Kolkata-a Mother Teresa mi thianghlima puan lawmnaah khuallian niin a hmanpui a; Mother Teresa mi thianghlima puan a nih chu India leh a bik takin, Kristian sakhua vuantute tan thil lawmawm leh chhuan-awm tak a nih thu a sawi.

Mother Teresa-i'n mi harsa, hnuaihnung, chanhai leh rethei, damlo te, khawtlang leh an chhungte pawhin an ensante leh sakhua thliar loin rawng a báwl tih sawiin, Lal Thanhawla chuan, "Mihring an nihna angin a hmangaihin a lainat a, an tan theihtawp chhuahin rawng a bâwlsakna ropui hi khawvelah sawi tur a tam lo. Sakhaw dangte pawhin a hnathawh chu ropui tiin an ngaisang hle a ni," a ti.

Chief Minister chuan, Mother Teresa chu a dam laiin ṭum eng emaw zat a hmuh thu leh Kolkata-a Missionaries of Cha-rity hmunpui a tlawh ṭhin thu sawiin, "A bula awm kha a thla--muan-thlak a ni. Mihring hmuh-ah nu lian ni lo mah se, a chak-na kha rinnaa innghat a nih avangin a rilru, a ngaihtuahna leh a thlarau nun kha a chak em em a, khaw-vel-in a ngaihluin a hre reng dawn a ni," a ti. CM hian kal khawmte chu Mother Teresa entawn a, khawngaihna leh hma-ngaihna nena mi dangte tan mal-sawmna nih tum turin a chah.

Missionaries of Charity hi Mother Teresa-i'n Vatican phalnain kum 1950 velah a din a, tunah hian ram 139-ah rawngbawlna an nei a, thawktu (nun) 5,160 velin damlo leh mi harsa enkawlna in 758 vel an enkawl mek a ni.