7th. Pay kan tlin hrih lo - CM

Chief minister Lal Thanhawla chuan, tun dinhmunah chuan Mizoram sorkarin a hnathawkte hnena 7th. Pay anga hlawh pek a tlin hrih loh thu a sawi.

Chief Minister hi nimin khan Kolkata aṭangin a rawn haw a; Lengpui Airport-a VIP lounge-ah thuthar thehdarhtute zawhna chhangin, "Sum sên belhna tur lam chu kan lawm vak lo a, sum hmuh belhna tur lam kan lawm zawk. Sorkar laipui aṭanga
ṭanpuina tam zawk hmuh a nih loh chuan tun dinhmunah chuan 7th Pay kan tlin rih lo," a ti.

Land reform chungchangah hmalak mek a nih thu sawiin CM Hawla chuan, "Kan sor-kar hmasakin land reforms siamṭha turin committee kan din a, kan awm loh chhungin a zûzî leh a, zûzî lo se chuan Tuirial Hydel Project pawh tihchhiat vek a ni lo ang," a ti a; land reforms siamṭhat hna chu Land Revenue & Settlement department kutah a awm mek thu a sawi.

Lal Thanhawla chuan zawhna chhangin, a awm loh laia Good & Service Tax (GST) hman a nih theihna atana India danpui tihdanglam pawmpuina tur Assembly House-in a pawm chu a ruahmanna a nih thu a sawi a, "Governor hnena rawtna ka thlen angin Assembly session kha GST chungchang ngaihtuahna atana koh a ni a, ordinance pakhat a remchan avangin ngaihtuah tel a ni," a ti.

GST ṭha a tih leh tih loh zawhna chhangin, CM Hawla chuan, Mizoram chu India rama awm a nih avangin a duh emaw, duh lo emaw, hman tho a ngaih tur thu a sawi.

Mother Teresa mi thianghlima puan a nih lawmna, Kolkata-a neiha khualliana sawm a nih chungchangah Chief Minister chuan, "Mother Teresa International Award Committee a awm a, hemi hnuaiah hian committee awm lehin, sakhaw tin telna a ni a, ram dang mite pawh telin, anni hian khuallian atan hian min rawn sawm a ni," a ti a; an programme-ah sakhaw hrang hrang hotute an tel thu a sawi.

Lal Thanhawla chuan, Mother Teresa mi thianghlima puan lawmna buaipuite chu mi ropui tak tak ni mah se, tel tura an sàwmte chu mi hnuaihnung zawkte an nih thu a sawi a, "Mother Teresa-i'n a ngaih pawimawh
ṭhin mi hnuaihnung zawkte ngaih pawimawh an ni. Kolkata-ah chuan Mother Teresa an ngaisang tak zet a, an secular em avangin BJP tan chuan sorkarna chan a harsa ang," a ti.

Chief Minister chuan, Mother Teresa nen a dam laiin ṭum eng emaw zat an inkâwm tih sawiin, "Kum 1993-94 khan New Delhi-ah a kut atangin Citizen's Award ka dawng a, kan haw lam thlawhnaah kan chuang dun a, darkar khat chuang inkâwmin a kut
aṭangin malsawmna min pe a ni," a ti.

Lal Thanhawla hian Mother Teresa thih hnu, kum 2009 khan Mother Teressa Lifetime Achievement Award a dawng leh a ni.