Nu pahnih thiin chhar

Siaha district-a Chhuarlung khaw rama Mobyu leiletah hmeichhe pahnih, N Siadei (60) w/o Laiki leh Z Elizabeth (32) d/o J Mahlo te chu September 7, 2016 zan khan thia chhar an ni a; police-te'n an chhui zui mek.

Chhuarlung hi Siaha aṭanga km. 55 vela hla a ni a; Siaha Police Station aṭanga thu dawn danin, Sidey leh Elizabeth-i te feh hi tlaiah an haw loh avangin an chhungte ngaihṭha lo chuan an fehna, Myanmar ramri bula Mobyu leiletah an ngaihven a, zan dar 7 velah thiin an va hmu ta a ni.

Elizabeth-i chu leilet thlám chhungah saruak veka awmin, hnungkhirha hmuh a ni a, a ring ruh a tliah bakah, chema sahna hnûhmá hmuh a ni. Sidey-i pawh thlám páwnah thia hmuh a ni a, a lûah hliam a tuar.

He thil thleng hi Siaha police-ten chuan Nilaini zan dar 9 velah an hria a, SP hoin police eng emaw zat enfiah turin an kal nghal a, an chhui mek a ni.

He thihna chung-changah hian MHIP general headquarters chuan thuchhuah an siam a, tualthattu man chhuak a, dan anga a na thei ang bera hrem turin thuneitute an phut