Tanhrila FCI kudam sawn thuai turin MZU JAC-in Chief Minister an ngen

Mizoram University (MZU) Joint Action Committee (JAC) chuan, nimin khan chief minister Lal Thanhawla hnenah lehkha thehlutin, Tanhrila Food Corpo-ration of India (FCI) kudam chu sawn chhuah thuai a nih theih nana hma la turin an ngen.

MZU JAC-te chuan, "Kan thu rawn thlente hi min ngaihtuahsak a, September 13, 2016 ral hma ngeia chhanna mumal leh ruahmanna pawmawm tak min pe turin kan ngen a che. Hun tiam chhunga kan beisei ang chhanna kan hmuh loh chuan eng pawh thleng se, sorkar thiam loh a ni tawh ang," an ti.

MZU JAC chuan, FCI kudam sawn chhuah an duh chungchang chu kum kua kal ta chhungin sorkarah leh FCI-ah an thlen tawh ṭhin tih an tarlang a, "Kan hmalakna tir lamah FCI kudam hi Zoram chaw bél a nih avangin dimdawi leh hawihháwm takin kan nawr ṭhin. Mahse, chu chuan rah ṭha a chhuah thei lo," an ti a; Chief Minister leh FCSCA Minister hmuh an tum ṭumah pawh an tan hun an pe thei lo niin an ziak.

MZU JAC tarlan danin, an hruaitute'n August 22, 2016-ah Chief Minister hmuh an dil a, mahse, an hmu thei lo. August 24-ah Supply Minister hmuh tumin appoinment an siam leh a, chutah pawh chuan an hmuh a hun ṭêp tihin an hmu thei lo leh bawk. Chungte avang chuan August 26-ah press conference an ko ta a ni.

MZU JAC-ah hian MZU Students Council, MZU Teachers Asso-ciation, MZU Non-Teaching Employees Association leh MZU Research Scholars Association-te an tel a ni.

MZU JAC thil phûtte

1. FCI kudam hi hnawk ti lo mah ila, a bâwmtu truck ho hian harsatna min siam avangin kudam hi a rang thei ang bera sawn chhuah ni rawh se.

2. FCI kudam hi sawn chhuah nghal a harsa a nih pawhin, hman chhunzawm tawh loh (abandon) ni rawh se.

3. Kawng hrang hranga chhutin, he laia FCI kudam awm hian ṭhatna aiin ṭhat lohna a ngah zawk a, inphur luta inphur chhuak reng lo hian sawn chhuah thuai ni se. Diesel man, kawng chhia leh motor tan hrim hrim bakah, mipui vantlang leh sorkar tan pawh a ṭha zawk vek a ni.